KUCHING: Perintah Sarawak sedia berunding ngaga gelanggang futsal kediri enti bisi peminta enggau timbal majak manah ba main nya di nengeri tu.
Menteri Nembiak, Lumba enggau Pemansang Orang Dagang Sarawak Dato Sri Abdul Karim Rahman Hamzah madah, perintah seruran berundingka peminta pemansang fasiliti enti siti-siti main enggau lumba nya nerima timbal ti manah ari komuniti.
“Kitai engka deka berundingka pekara tu, tang kitai tentu patut berati ke penuduk bajet dulu,” ku iya.
Iya nyebut jaku nya ba Pengawa Bejadi Pekit Futsal Trofi Presiden Gerempung Nembiak Nasional Besatu Sarawak (SABERKAS) SABERKAS di Arena Sukan Simpang Tiga, ditu, Hari Lima.
Berebak enggau nya, Dato Sri Abdul Karim mega enda ngadang mayuh orang masuk pekit terubah diatur ti ngempuruka 34 tim ari selampur Sarawak, berengkah ari Tanjong Datu ngagai Ba’Kelalan.
Iya ke mega Presiden SABERKAS madah, pemanah timbal futsal sekali tu nunjukka main nya majak dikerindu rayat Sarawak lebih agi ari raban nembiak.
Nya alai ku iya, pekit nya deka diatur baru sereta deka diatur ninting taun ngangkatka pekit nya program ninting taun SABERKAS meransang aktiviti bepengerai nengah lumba.
Sama datai, Kaban Kunsil Nengeri (ADUN) Daro ke mega Sekretari Besai SABERKAS Dr Safiee Ahmad, Senator Dato’ Ahmad Dato’ Sri Ibrahim sereta temuai dipebasa bukai.-EDISI UKAS
Pemberita: Ahmad Daniel Faiz
Gambar: Shahril Haqim
