MANCHESTER: 'Data' diatu nyadi pun penatai baru ke ulih ngembing pejalai ekonomi Sarawak nyerumba pemansang teknologi Artificial Intelligence (AI) ti ngubah landskap global.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, dalam kandang 10 taun ke udah, AI udah mayuh ngubah struktur ekonomi bepun ari pemansang teknologi chip sereta pengulih nyimpan data ke majak moden.

Ku iya, ubah nya diatu udah datai ba tikas baru alai AI ukai semina teknologi sukung tang nyadi elemen beguna dikena nentuka pelin pemansang.

"Lima taun sebedau tu kitai nyebut bekaul AI, tang diatu tu majak beguna.

"Dalam kandang 10 taun, AI udah mansang datai ba tikas ke tinggi agi lalu lima taun ke deka datai, teknologi tu nyadi moden agi," pia ku iya.

Iya nerangka pekara nya maya randau strategik begulai enggau pemain industri ti betuaika Kaban Parlimen Manchester Rusholme, Afzal Khan di British Muslim Heritage Centre ditu, Hari Satu.

Nerang silik, iya madah, data mega nyadi pun penatai baru ke ukai semina nyukung pengerembai ekonomi tang nyadi pugu ngagai pemujur ngatur tanggungpengawa rama ti lebih agi efektif.

"Data deka meri pekara ke baru ngagai kitai. Tu nyadi pun penatai ke ulih ngembing pejalai kitai jauh agi ke mua, baik nya ekonomi tauka tanggungpengawa rama," ku iya madah.

Kelimpah ari nya, Premier Sarawak madah, pemansang teknologi begunaka sukung ekosistem nyengkaum chip, palan data enggau sistem ngatur penerang.

Ku iya, Sarawak majak ransing ngenegapka kapasiti nya nengah pemansang modal mensia nyengkaum nganjung nembiak nampung pelajar ngagai menua bukai.

Maya nya, bela diatur pengawa nyain Sempekat Pemereti Ati (MoU) dikena ngenegap kerejasama strategik sereta nyerungkai pengulih baru ke tau meri pemaik ngagai pemansang Sarawak enggau mensia mayuh.

Bela datai, Sapit Premier Sarawak Datuk Amar Dr Sim Kui Hian, Sekretari Perintah Sarawak Datuk Amar Mohamad Abu Bakar Marzuki, Sapit Menteri ba Opis Premier Sarawak (Undang-Undang, MA63 enggau Kaul Nengeri-Perintah Besai) Datuk Sharifah Hasidah Sayeed Aman Ghazali, Sekretari Pekara Wang Sarawak Dato Sri Wan Lizozman Wan Omar, Sapit Sekretari Perintah Sarawak (Pengatur enggau Pemansang Ekonomi) Dato Sri Dr Muhammad Abdullah Zaidel, Direktor Unit Pengatur Ekonomi (EPU) Sarawak Datu Ir. Ts. Awang Mohd Fadillah Awang Redzuan, Direktor Yayasan Sarawak Datu Mohamad Junaidi Mohidin, Direktor Unit Ubah Klimet enggau Diplomasi Kuasa Sarawak (SACED) Ir. Dr Angelia Liew San Chuin, Tuai Pegawai Eksekutif Sarawak Artificial Intelligence Centre (SAIC) Prof. Patrick Then, Tuai Pegawai Eksekutif SMD Semiconductor Shariman Jamil enggau Direktor Unit Komunikasi Awam Sarawak (UKAS) Awang Putrayusrie Awang Redzuan.-EDISI UKAS