LIMBANG: Pengawa milih Parlimen Limbang nyadi entara palan bejalaika inisiatif Sekula Model Pelajar Digital Menua Pesisir (SIMPEL) mandangka pengeran perintah negap pelajar digital ba kandang menua pesisir kelebih agi mutar pemar arus Internet enggau suntuk fasiliti teknologi nengah inisiatif inovatif enggau beselinting agi.

Menteri Pelajar, Fadhlina Sidek madah, Limbang dipilih laban bisi peminta kediri empu bejalaika agenda pelajar digital menua pesisir ti begunaka pengawa mutar ti engkeman enggau pemar.

Ku iya, SIMPEL nya ukai semina meri perati ngagai sukut infrastruktur, tang mega nyadi penyungkak bejalaika Polisi Pelajar Digital (DPD) dikena nempa nembiak pintar digital sereta pengajar ti landik ba pedagogi bepelasarka teknologi.

“Pengawa milih Limbang tu bebida ari parlimen bukai laban nya dipilih ngemujur agenda besai pelajar digital menua pesisir,” ku iya lebuh dirandau pemberita serimbai Program Atur Parlimen Siri Satu Taun 2026 Bekaul Sukung Kualiti Pelajar Menua Pesisir di SMK Agama Limbang, empai lama.

Ku iya, entara inisiatif dipejalai iya nya ngena DELIMa Edge di SMK Agama Limbang nyadi projek proof of concept nentuka pengawa belajar digital ulih ditampung taja arus Internet enda deras.

Pia mega, SK Limpaku Pinang deka ngadu mekanisme Network Offline Digital Environment (NODE) ti nentuka sekula beoperasyen nyadi hab digital mikro lalu enda bepanggai penuh ba arus Internet.

Ku iya, inisiatif nya nunjukka sekula menua pesisir agi ulih ngena teknologi digital taja napi penanggul arus Internet enda deras.

Nambah ke nya, Program Sukung Profesional (PSP) nengah DPD 2026 deka ngemerat embing teknikal, pedagogi digital enggau nyendia kereban ngagai pengajar sereta nembiak kelebih agi ba kandang menua pesisir.

Nyadi tambah, semua lapan sekula di Parlimen Limbang deka nerima siti papan pintar lalu 140 tablet diagih ngagai tujuh sekula.

Enam sekula primari mega nerima agih belanja RM50,000 dikena negap pemansang digital.

Fadhlina madah, opis menteri mega bejalaika Pengawa Ngerembai Inklusif Prasekula (PIPS) nentuka akses pelajar tumu ti likun, bisi kualiti enggau inklusif ngagai nembiak ba menua pesisir.

Ku iya, pengawa nyeruri siti kelas prasekula di SMK Agama Limbang ditaga tembu June 2026, seraya pengawa ngaga dua kelas prasekula baru di SK Bandar Limbang ditaga tembu bulan tu.

Iya nandu, opis menteri mega meri perati ngagai pengawa mutar isu lokal nengah Pengawa Mutar Isu Pelajar Parlimen Limbang (SIPP) ti nyerangkung sukut infrastruktur, ngintu pengelantang pengajar enggau pengelikun sekula nengah kerejasama bemacham agensi.

Iya madah baru, tiga sekula iya nya SK Limpaku Pinang, SK Lubok Tekurok enggau SK Telahak nerima agih belanja sepenyampau RM624,125.10 dikena nyeruri kuarters, prasekula, jalai bedarat enggau tangki ai.

Bela datai, Sapit Menteri Pengangkut ti mega Parlimen Limbang, Datuk Hasbi Habibollah, Sapit Tuai Direktor Pelajar Malaysia (Sektor Operasyen Sekula), Zainal Abas enggau Direktor Pelajar Sarawak, Omar Mahli.- EDISI UKAS