KUCHING: Industri kraf di nengeri tu ukai semina nyadi lambang pesaka asal, tang mega mansang nyadi penyungkak ekonomi, pelasar ngempung komuniti pupu bansa sereta dunya budaya ti nyagu nama Sarawak ke tikas antarabansa.

Menteri Dagang Temuai, Industri Kreatif enggau Seni Pemerindang Sarawak, Dato Sri Abdul Karim Rahman Hamzah madah, pengaya seni kraf nengeri tu mandangka bemacham budaya sereta identiti nyelai mayuh etnik di Sarawak.

Ku iya, Sarawak ti ngembuan lebih 34 etnik bisi pengelain kediri empu nengah bemacham asil seni kraf baka tenun Pua Kumbu komuniti Iban, seni manik Orang Ulu, songket enggau keringkam Melayu Sarawak, terendak Melanau sereta ukir kayu komuniti Bidayuh.

“Tiap asil kraf tu ukai semina manah dipeda tang mega sarat enggau reti sejarah, pengarap enggau identiti komuniti kitai,” ku iya.

Iya nyebut jaku nya nengah teks jaku ti dibacha Sapit Menteri Dagang Temuai, Industri Kreatif enggau Seni Pemerindang Sarawak, Datuk Snowdan Lawan serimbai Pengerami Aidilfitri enggau Mantar Gawai, ditu kena Hari Lima.

Nambah ke nya, iya nyemetak madah ke anyam, tenun, ukir enggau seni manik nya asil keranjai jari ti ukai semina mandangka identiti sesebengkah raban bansa, tang mega ulih ngasuh kitai temegah sereta bebasa ke komuniti bukai.

Berebak enggau nya, iya nyemetak madah ke industri kraf diatu nyadi sektor ekonomi ti signifikan enggau bisi pengulih besai rembus makit global.

Ku iya, produk kraf baka anyam, ukir kayu, manik enggau tekstil ukai semina bisi rega estetika tinggi tang mega rega komersial ti ulih nambah penatai pemisi ngagai artisan lokal enggau komuniti menua pesisir.

“Lebuh produk kraf dipandang ba menua tu enggau menua luar, tang mega nyadi duta budaya ti nyagu Sarawak ngagai dunya.

“Tu pengelebih kraf ti ulih mai nama kitai ngelui adan menua,” terang iya.

Bela datai, Sekretari Mendam Opis Menteri Dagang Temuai, Industri Kreatif enggau Seni Pemerindang Sarawak (MTCP) Morshidi Fredrick, Sapit Sekretari Mendam MTCP Julin Alen sereta temuai dipebasa bukai. - EDISI UKAS