Pengelikun Sekula Terus Dijaga Nyeliah Penusah Enda Disadang Nyadi
DARO: Pengawa negap sukut pengelikun ba sekula nyengkaum meresa sistem sambung tali karan meseti terus dikemanah nentuka palan belajar ti likun enggau lantang agi ngagai bala nembiak.
Kaban Kunsil Nengeri (ADUN) Daro, Dr Safiee Ahmad madah, penusah kena tangkap karan ti nabanka siku nembiak ba siti sekula sekondari ditu patut ngajar semua raban ngambi berati enggau ngemanah tikas pengelikun ba palan pelajar.
“Kitai berasai chukup sinu ninga berita penusah nya sereta meri penyinu ati ngagai sida niang sebilik.
“Nadai siku orang deka ke pekara baka tu nyadi. Tang, pengudah penusah nya, kitai meseti berunding lalu merening utai ti patut dikereja nentuka penusah nya enda betandu,” ku iya ngenang penusah nya.
Ku Dr. Safiee, siti pansik disadang dipejalai Opis Menteri Pelajar Malaysia (KPM) begulai enggau agensi bekaul ngambi ngelala pun penusah nya nyadi.
Terang iya, entara atur lengkas ti meseti diberi perati iya nya meresa semua sistem sambung tali karan ba sekula nya nyengkaum engka begunaka pengawa ngemanah infrastruktur berindik ari begunan nya ti udah lama dikena.
Ku iya baru, pengawa meresa mega meseti ngaul tali karan tambah ti engka disambung nadai nitih ke spesifikasyen pengelikun tauka enda dikereja sida ti patut.
“Penusah tu patut nyadi pemun berati ke semua sukut pengelikun kuasa karan ukai semina ba sekula tu, tang mega ba sekula bukai,” ku iya nyemetak.
Nambah ke nya, iya mega madah ke sekula kayu enggau begunan lama bisi risiko ti tinggi agi napi penanggul sambung tali karan ti udah lama, nya kebuah sukut pengelikun patut diperati manah.
Kelimpah sistem kuasa karan, Safiee mega merambu fasiliti pemun bukai nyengkaum sistem paip ba kandang sekula diperati baru enggau berundingka pengawa ngena kereban ti likun agi dikena ngurangka risiko sambung kuasa karan.
Iya nyemetak madah ke pemesai guna pelajar pengelikun enggau latih ngenyit ngagai nembiak kelebih agi nembiak ti diau bemalam ba buding nyengkaum nerang ke chara nyaup sida ti kena tangkap karan ngena chara ti likun enggau betul.
