DARO: Pengawa meresa sistem sambung tali kuasa karan ba sekula kelebih agi ba menua ulu meseti dipejalai lengkas berindik ari penusah kena tangkap karan ti nabanka nyawa siku nembiak ba siti sekula sekondari di Daro.

Kaban Parlimen Igan, Ahmad Johnie Zawawi madah, penusah nya enda patut nyadi laban sekula meseti nyadi palan ti likun ungkup nembiak sereta raban pengajar.

Ku iya, randau udah diatur begulai enggau Pegawai Pelajar Pelilih Daro bekaul atur bukai nentuka penusah ulih diseliah enggau enda betandu dudi hari.

“Raban Opis Kereja Raya (JKR) enggau Sarawak Energy Berhad mega udah dipadah lalu benung bejalaika atur ti patut,” ku iya ngelansa senentang penusah nya.

Berindik ari nya, Ahmad Johnie nyemetak madah ke pengawa meresa belebuh ba sistem sambung tali kuasa karan ti lama sereta kereban pengelikun penusah angus meseti dipejalai konsisten ba semua sekula.

Ku iya, raban sekula mega dipinta ngulihka bantu teknikal ari agensi bekaul dikena bejalaika pengawa meresa sereta nyeruri dikena nyamin pengelikun nembiak enggau staf sekula.

Kelimpah ari nya, iya madah, penusah nya mandangka isu sekula repuk di Sarawak ukai semina ngaul struktur begunan lama, tang mega nyerangkung perengkaguna pemun baka sistem sambung tali karan ti begunaka perati khas.

Nya alai, iya meri penyinu ati ngagai sida niang sebilik lalu besampika semengat niang diau likun. - EDISI UKAS