KUCHING: Bidang Sains, Teknologi, Injiniring enggau Matematik (STEM) diatu nyadi pelasar beguna marit anak Dayak ba sektor ekonomi ngena teknologi tinggi nipak agenda pemansang Sarawak ti meri perati ngagai hidrogen, kuasa gadung enggau inovasyen dudi hari.

Menteri Pelajar, Inovasyen enggau Pemansang Penau Sarawak, Dato Sri Roland Sagah Wee Inn madah, pengawa nguasa STEM beguna amat berindik ari tunga kuing pemansang nengeri diatu majak beratka industri bepelasarka sains enggau teknologi.

Ku iya, Sarawak begunaka mayuh pengereja landik ba bidang profesional enggau teknikal dikena nyukung pemansang ekonomi dudi hari.

“Enti deka meda kitai jampat maju, tu aja mih jalai iya nya meri perati lalu ngemansang pelajar STEM,” terang iya.

Iya nyebut jaku nya lebuh bejadi Gempuru Besai Tiga Taun Sekali Ke-11 Serakup Nasional Dayak Bidayuh (DBNA) sereta Pengerami Makai Lemai DBNA ba Balai Mayuhguna DBNA kena Hari Lima.

Ku iya, taja bisi selinting 60 peratus nembiak ba aliran STEM manggai 2030, penyampau nembiak ti ngambi bagi kelebih agi ari komuniti menua pesisir ba bidang nya apin nyapai tikas ngemantupka ati.

Terang iya, pelajar STEM ukai semina meri perati ngagai pengawa nampung pelajar ngagai universiti aja, tang mega nyerangkung Pelajar enggau Latih Teknikal enggau Vokasional (TVET) ti diatu majak beguna ba makit kereja.

Berebak enggau nya, iya minta apai indai sereta mensia mayuh meransang mayuh agi rebak biak ngaul diri ba bidang STEM enggau teknikal nentuka rebak dudi ulih besemekih ba ekonomi bepelasarka teknologi.

Bela datai, Sapit Menteri Pengangkut (Langit enggau Darat), Datuk Dr Jerip Susil, Sapit Menteri Pengangkut (Tasik enggau Sungai) Datuk Henry Harry Jinep, Sapit Menteri Industri Pemakai, Komoditi enggau Pemansang Kandang Menua Sarawak, Datuk Martin Ben, Kaban Parlimen Puncak Borneo Datuk Willie Mongin, Presiden DBNA Datuk Ik Pahon Joyik sereta temuai dipebasa bukai. - EDISI UKAS

Pemberita : Lonney Jinab