KUCHING: Sarawak merambu numbuh sekula veterinar keterubah di Borneo nyadi chara strategik negap pemansang industri nupi jelu nengeri sereta nempa mayuh agi pakar veterinar menua.

Menteri Pelajar, Inovasyen enggau Pemansang Penau Sarawak, Dato Sri Roland Sagah Wee Inn madah, institusyen nya diperambu ditumbuh nengah kerejasama enggau Universiti Putra Malaysia Sarawak (UPMS) semak Semenggoh.

Ku iya, diatu Malaysia semina bisi dua sekula veterinar ngujungka pakar ba bidang nya apin chukup.

“Kitai deka numbuh sekula veterinar kediri di Sarawak laban ba Borneo mega nadai sekula veterinar,” ku iya.

Iya madah munyi nya lebuh bejadi Gempuru Besai Tiga Taun Sekali Ke-11 Serakup Nasional Dayak Bidayuh (DBNA) sereta Pengerami Makai Lemai DBNA ba Balai Mayuhguna DBNA kena Hari Lima.

Iya mega madah, pengawa numbuh institusyen nya beguna amat dikena nyukung agenda pemansang industri nupi jelu Sarawak ti dipeda bisi pengulih nyadi entara pemansut ekonomi besai nengeri dudi hari.

“Sekula veterinar nya deka disikap hospital jelu sereta fasiliti latih dikena nempa mayuh agi lutur veterinar menua ti bepengelandik tinggi,” ku iya.

Kelimpah ari nya, iya madah ke penanggul suntuk lutur veterinar diatu ngujungka mayuh klinik jelu nyau ngambi pengereja menua luar nyengkaum ari Indonesia.

Nya alai, iya ngarap pengawa numbuh sekula veterinar nya ulih nyadi penyungkak pemansang modal mensia lokal kelimpah negap ekosistem industri veterinar di Sarawak. - EDISI UKAS

Pemberita : Lonney Jinab