KUCHING: Dawa ti madah ke perintah enda bebendar mutar isu tanah Adat Bansa Asal (NCR) di Sarawak nya enda patut berindik ari manggai 95 peratus peminta tanah NCR diatu benung diadu nyengkaum sekeda ari nya udah nerima geran ngempu.
Menteri Pelajar, Inovasyen enggau Pemansang Penau Sarawak, Dato Sri Roland Sagah Wee Inn madah, perintah nengeri enda kala nejuka isu tanah NCR tang mega pengawa nyukat enggau ngenuku hak ngempu terus dipejalai.
“Anang alah ajum dawa dibalut politik ti madah ke perintah enggai nyukat kelingi tanah NCR laban kitai empu asal ari komuniti NCR,” ku iya.
Iya madah munyi nya lebuh Gempuru Besai Tiga Taun Sekali Ke-11 Serakup Nasional Dayak Bidayuh (DBNA) sereta Pengerami Makai Lemai DBNA di Balai Mayuhguna DBNA kena Hari Lima.
Ku iya, agi tubah sekeda genturung pendiau ti apin nganjung peminta tanah NCR taja agi tubah peranak ti patut nerima kelimpah nerima bantu belanja ari pengari rayat.
Ku iya, pekara nya nyadi ketegal kurang inisiatif enggau atur bukai ari tuai komuniti empu dikena ngadu peminta bekaul.
Nya alai, iya minta genap genturung pendiau ngambi ransing agi ngadu sereta minta ngaku tanah NCR dikena nentuka hak ngempu tanah ulih dijaga ke pemaik rebak dudi. - EDISI UKAS
