SELANGAU: Peminta komuniti menua pesisir terus diberi perati lebuh peranak Rh. Missie Anggat, Ulu Arip nerima bantu atap spandek nengah Projek Mesra Rakyat (MyKHAS) dikena nyeruri rumah panjai sida.

Bantu ngaul 22 pintu rumah nya diagih Kaban Parlimen Selangau, Edwin Banta dikena mantu peranak ngasai rumah ti likun enggau lantang agi.

Inisiatif nya dipeda besai reti ngagai komuniti rumah panjai nya berindik ari sekeda atap lama udah repuk enggau patut ditukar lengkas kelebih agi maya napi gaya hari enda tentu.

Peranak Rh. Missie Anggat nerima manah bantu ti diberi lalu ngasai ke nya bukti penyiru ngagai pengelantang komuniti menua pesisir ti semampai begunaka sukung nambah kualiti pengidup besehari-sehari.

Kelimpah nyaup ngelempung tating peranak, bantu nya mega meransang semangat begulai dalam komuniti lebuh pengawa nyeruri dipejalai peranak rumah panjai chara beripai.

Nangkan nya, Tuai Rumah Missie Anggat meri terima kasih ngagai Edwin Banta ke bantu sereta penyiru sida ngagai peminta peranak dia.

Ku iya, bantu ti diterima ukai semina meri pemaik ngagai peranak diatu, tang mega nyadi penyungkak nyaga pengelantang komuniti rumah panjai. - EDISI UKAS