Pengerami Main Asal & Dagang Temuai Bau Deka Dipasuk Ba Kalinda Visit Malaysia
BAU: Pengerami Main Asal enggau Dagang Temuai Bau deka dipasuk ba kalinda rasmi Visit Malaysia seraya diangkat nyadi aktiviti ninting taun empas besai dikena ngentapka penuduk pelilih nya nyadi palan dagang temuai budaya enggau pesaka asal di Sarawak.
Menteri Dagang Temuai, Seni enggau Budaya, Dato Sri Tiong King Sing madah, Tourism Malaysia deka diasuh nentuka pengerami nya terus disagu nyadi siti ari produk dagang temuai ti bisi pengulih ungkup timpuh panjai.
“Enti kitai deka endur tu terus mansang, kitai meseti semampai sedia ari sukut pemeresi, perengkaguna, basa enggau peneleba temuai.
“Tourism Malaysia mega deka nyaup ari sukut promosyen enggau publisiti,” ku iya lebuh bejadi Pengerami Main Asal enggau Dagang Temuai Bau 2026 di Balai Datuk Peter Nansian Ngusie, Palan REDEEMS Bau kena Hari Enam.
Nambah ke nya, ku iya, Bau bisi pengelebih kediri nyadi palan ti kaya enggau sejarah, main asal enggau pesaka asal ti agi idup sereta dikemeran nyentuk diatu.
“Tu mih pengelebih kebendar endur tu ke alai main asal ukai semina pemerindang tauka pekayan asal, tang mega chara komuniti bela bebasa, idup begulai enggau nyaga kaul entara pangan diri.
“Temuai sehari tu ukai semina deka meda palan pematak, tang mega deka belajar budaya, meda pengidup komuniti menua enggau ngasai peneleba baru.
“Bau bisi pengelebih nya lalu meseti terus dikerembai enggau manah,” ku iya.
Iya nandu, inisiatif bepelasarka main asal enggau peneleba komuniti nya beguna amat dikena ngemujur Taun Nemuai Ke Malaysia 2026.
Berebak enggau nya, iya mega meri terima kasih ngagai semua raban nyengkaum komuniti menua ti semampai nyukung inisiatif Opis Menteri Dagang Temuai, Seni enggau Budaya (MOTAC) dikena ngemansang sektor dagang temuai.
“Pengelebih sesebengkah endur nya ukai semina bepanggai ba perintah aja, tang mega dilempai ngagai tandan bau rayat ti sanggup begulai ngemujur pekara tu,” ku iya nyemetak. - EDISI UKAS
