SIMANGGANG: Pengerichah enggau nostalgia nyura Program Sarung Kebaya & Batik Night diatur Palan Aktiviti Orang Tuai (PAWE) Sri Aman kena Hari Enam.

Program nya ngempuru orang tuai sereta komuniti menua dikena nyagu pesaka budaya nengah pengawa bekenaka kebaya enggau batik sambil nyempil kaul entara pangan diri.

Bemacham gaya kebaya enggau batik dikena sepanjai program, mandangka pengelain budaya sereta pesaka asla komuniti ti agi terus dikenang enggau dijaga nyentuk sehari tu.

Kelimpah nyadi pelasar ngerami budaya menua, program nya mega meri peluang ngagai orang tuai terus regas, berandau enggau ngambi bagi ba aktiviti rama begulai enggau komuniti.

Pengawa ngatur program nya mega dikena ngumpul belanja ngambi nyukung aktiviti sereta ngintu pengelantang orang tuai di PAWE Sri Aman seraya nerang ke pangku pengawa palan nya ngagai mensia mayuh.

PAWE Sri Aman ti ditumbuh kena 26 June 2024 nengah Opis Pengelantang Komuniti enggau Opis Menteri Pemansang Indu, Ruang Bilik enggau Komuniti belabuh disedia ngagai mensia mayuh kena 20 November 2024 lalu diatu bisi 163 kaban.

Kelimpah nyendia palan aktiviti ungkup orang tuai, PAWE Sri Aman mega nyadi palan komuniti ti nyeliah raban nya ngasai kediri dikemelu.

Program nya mega mandangka semangat begulai komuniti nentuka pesaka budaya terus dijaga enggau ditampung rebak dudi. - EDISI UKAS