BATANG LUPAR: Penembu Jematan Batang Lupar 1 nurai sejarah baru pemansang Sarawak alai jematan 4.84 kilometer (km) nya dipadu meraka sungai pemadu panjai di Malaysia.
Sapit Premier Sarawak, Datuk Amar Douglas Uggah Embas madah, projek beungkus RM848.7 juta nya nyadi kelai pengeransing Perintah Sarawak pegai Gabungan Parti Sarawak (GPS) nyungkak pemansang betikas besai ngena belanja diri empu.
"Tu nyadi sejarah kitai. Jematan tu digaga ngena belanja diri empu.
"Kitai berasai temegah ati enggau pemujur tu," ku iya madah.
Iya bejaku munyi nya maya dirandau media sepengudah Pengerami Mantar Bejadi Jematan Batang Lupar 1, Hari Empat.
Iya mega madah, penembu jematan nya ngujungka mensia mayuh badu agi ngena feri maya nengah jalai nebing tasik ari Kuching ke Miri.
"Suba kitai nganti 30 ngagai 45 minit (ngena feri), tang diatu urung lima minit aja ngelayang ke seberai," pia ku iya.
Nangkan nya, Menteri Utiliti enggau Telekomunikasyen Sarawak ke mega Kaban Kunsil Nengeri (ADUN) Sebuyau, Dato Sri Julaihi Narawi madah, penembu jematan nya kelai Perintah Sarawak ransing numbuh projek ke suba dipadah tusah digaga.
Ku iya, projek Batang Lupar sebagi ari tiga projek jematan ba jalai nebing tasik ke kala enda dipenyadi perintah dulu sebedau Perintah Sarawak ngaga pemutus ngaga ngena belanja diri empu.
"Sehari tu kitai meda jematan tu ulih digaga. Taja keterubah suba mayuh penemu madah ulih ke enda projek tu digaga.
"Perintah Sarawak pegai Premier Sarawak ngambi pemutus berani ngaga projek nya, lalu sehari tu kitai empu ulih meda," ku iya nerang.
Bela datai ba pengerami nya, Sapit Menteri Infrastruktur enggau Pemansang Penyangkai Kapal Sarawak, Datuk Ir Aidel Lariwoo, Konsul Jeneral Republik Rakyat China di Kuching, Xing Weiping, ADUN Beting Maro, Dato Razaili Gapor, ADUN Lingga, Dayang Noorazah Awang Sohor sereta bala bukai. -EDISI UKAS
