TEBEDU: Sepenyampau RM295,000 agih belanja Projek Mit Pemansang Menua Pesisir (MRP) diagih ngagai 59 Komiti Pemansang enggau Pengelikun Genturung Pendiau (JKKK) ba Kunsil Nengeri (DUN) Tebedu ba Pengerami Mantar Gawai Rando Tebedu 2026 ti diatur ba pelaman Opis Pelilih Tebedu, kena Hari Lima.

Kaban Kunsil Nengeri (ADUN) Tebedu, Dr. Simon Sinang Bada madah, bantu nya dikena nyaup JKKK ngatur bemacham program ngaul komuniti sereta peminta pemansang ba genturung pendiau sida.

Nambah ke nya, iya mega nerang ke Pasar Mutiara Tebedu deka nerima dua projek besai taun tu iya nya numbuh Dataran Mutiara Tebedu sereta Hab Ekonomi enggau Budaya.

Ku iya, projek nya deka dipejalai nengah agih belanja Greater Kuching Coordinated Development Agency (GKCDA) lalu disadang nyadi penyungkak pemansang ekonomi sereta palan pemansang baru ba adan menua Tebedu.

Pengerami nya mega dikena ngenang jasa Residen Bagi Menua Serian, Caroline Cleophas Joseph sekumbang gawa ba Bagi Menua Serian sebedau belidar gawa ke opis menteri baru belabuh 15 June tu.

Pengerami Mantar Gawai nya ukai semina nyadi pelasar ngerapit kaul komuniti, tang mega mandangka semangat beserakup enggau kerejasama rat entara tuai sereta rayat nyerumba Gawai Dayak.

Bela datai, Pegawai Pelilih Tebedu Gerard George Entigar, Pemancha Kane Manung sereta bala penghulu enggau tuai genturung pendiau. - EDISI UKAS