BINTANGOR: Raban akademik kelebih agi palan pematih pengajar meseti semampai sedia, inovatif sereta ulih neleba kediri enggau ubah landskap pelajar menua seraris enggau Kurikulum Sekula 2027 enggau Langgur Pelajar Malaysia 2026–2035.

Kaban Kunsil Nengeri (ADUN) Meradong Datuk Ding Kuong Hiing madah, pengawa besikap nya beguna endar nentuka palan pelajar terus relevan napi pemar Pelajar 4.0.

“Inisiatif tu mega beguna amat dikena nempa pengajar pematih ti kompeten, relevan enggau besemekih ba tikas global,” ku iya.

Iya madah munyi nya ba Pengerami Makai Ngintu Hari Pengajar diatur Kelab Pengelicha 2026/2028 Palan Pematih Pengajar (IPG) Kampus Rajang di Paramount Hotel Sibu kena Hari Enam.

Ba lansa bukai, ku Datuk Ding, IPG Kampus Rajang ngembuan sejarah kediri nyadi lambang kerejasama antarabansa nengah Langgur Colombo entara Malaysia enggau New Zealand kenyau ari taun 1966.

Ku iya, reti penyulut, kualiti enggau peneguh ti suah disebut nengah semangat“New Zealand” meseti terus ditegap nipak sulu jaku “Agi Idup, Agi Ngelaban” dikena negap institusyen pelajar pengajar ba nengeri tu.

“IPG Kampus ukai semina pesaka penyulut tebing Sungai Rajang, tang mega mangku pengawa besai nempa pengajar bekualiti ti nyulut ba pedagogi, manah ulah lalu ulih nyadi teladan ngagai mensia mayuh,” ku iya.

Iya mega nyemetak madah ke sulu jaku Hari Pengajar taun tu, “Guru Bitara, Nadi Negara”ukai semina pesan signifikan bekaul pangku pengawa pengajar ti ukai semina bekunsi penemu tang mega nyadi chunto ari sukut teladan, profesionalisme enggau integriti nyadi penyungkak besai pelajar menua. - EDISI UKAS