KUCHING: Teknologi moden agi diguna nentuka aktiviti nyerungkai ulih dipejalai maju enggau ekonomik adap Barat Sarawak ti bisi pengulih besai nyerungkai rizab minyak enggau gas baru.

Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, pengawa nyerungkai diatu ti dipejalai begulai enggau bakih industri, nyengkaum projek pemansang Sirung-Chenda nunjukka pemansang positif lalu bisi ke tumu agi ari taga ti dilanggur.

Ku iya, nya nentuka pengawa nyerungkai dikerembai ngagai endur baru ti apin diserungkai magang.

“Ba penemu aku, enti ditungkap geologi, rizab minyak enggau gas dipeda ulih diserungkai ba tebing tasik ari Kimanis, Sabah lalu nuju Brunei Bay.

“Udah nya bisi telaga minyak di Baram lalu di Mukah nyengkaum di Balingian.

“Ari Balingian deka nurun ke baruh laban endur nya apin diserungkai, nyengkaum adap Barat Sarawak.

“Enti kitai bisi teknologi baru ti digaga PTTEP, engka kitai ulih nyerungkai lalu berati ke mayuh agi rizab ti dikemisi adap Barat Sarawak,” ku iya.

Iya madah munyi nya lebuh dirandau pemberita pengudah pengawa nyain kontrak entara PTTEP Sarawak Oil Limited enggau Brooke Holding Sdn Bhd (BHSB) ungkup Projek Platform Pemansut Sirung di siti hotel tebilang, ditu kena Hari Dua.

Premier Sarawak mega madah, kompeni pemansut minyak nadai bisi ati nyerungkai endur nya berindik ari beguna ungkus tinggi lalu mansutka minyak masam.

Tang ku iya, teknologi pemadu baru ulih nyerara karbon enggau nyadi gas manis seraya karbon deka ditaruh nipak pemansang industri karbon.

“Nengah pemisi pemansang teknologi baru tu, pengawa nyerungkai ulih dipejalai,” terang iya. - EDISI UKAS

Pemberita : Ahmad Daniel Faiz
Gambar: Ibanez Jeffery