Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Utom madah, bantu barang diguna pemun kelebih agi pemakai nya entara sukut pemadu beguna nyamin pengelantang rayat.
Ku iya, pengawa bejalaika SKAS nyadi entara inisiatif Perintah Sarawak mantu raban ti begunaka bantu ngambi ulih bulih pengidup ti lantang agi.
“Perintah Sarawak udah nyaup ari sukut perengkaguna, pemadu beguna baka pemakai ngambi ulih ngelempung tating rayat nengah SKAS. Nya tuju asal,” ku iya.
Iya madah munyi nya ba Pengawa Bejadi Program Sumbangan Tunai Rahmah (STR) Taun 2026 Pelilih Sebauh enggau Bantu Barang Diguna Pemun Sarawak (SKAS) ungkup DUN Kemena di Balai Raya BDA Sebauh kena Hari Minggu.
Ku iya, perintah nengeri diiring Premier Sarawak naka ulih bejalaika bemacham inisiatif dikena ngubah tikas idup rayat Sarawak.
Entara inisiatif ti dipejalai nyengkaum Inisiatif Pelajar Nadai Bebayar tauka Skim Pelajar Tinggi Pechuma Sarawak (FTES), Bantuan Belanja Khas (BKK) ngagai anak Sarawak ti nampung pelajar ba palan pelajar tinggi perintah enggau peribit sereta bantu berumah ungkup raban B40 enggau M40.
Nambah ke nya, ku iya, Perintah Sarawak deka terus nyungkak ekonomi nengeri enggau nambah asil penatai pemisi nengeri nentuka semua inisiatif bantu ngagai rayat ulih ditampung belama.
Bela datai, Residen Bagi Menua Bintulu Datu Nyurak Keti, Pegawai Pelilih Sebauh Thaddeus Ling, Pegawai Pekara Wang Besai Sarawak Leonard Wilfred Yussin, pengari Tuai Polis Pelilih Bintulu Inspektor Collin Havit sereta Sekretari Politik Premier Sarawak Colin Patan. - EDISI UKAS
