KUCHING: Projek pemansang Sirung-Chenda disadang nyadi entara penyungkak besai nambah penatai pemisi Sarawak manggai taun 2028 nipak inisiatif negap sektor kuasa nengeri.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, nengah selinting pemansut keterubah ba taun 2028 sereta kapasiti begulai urung 15,000 tung sehari, projek nya deka meri empas besai ngagai asil nengeri nengah pengawa nyungkak industri minyak enggau gas.

Iya madah, nengah penyarut geopolitik ti majak ngeruga rega makit minyak enggau gas, pemansang baka Sirung mengkang beguna ba makit kuasa global ti majak enda tentu.

“Pemansang pemansut gas kitai ukai semina peluang industri tang mega nyadi pemansut strategik pengelebih fiskal, peneguh ekonomi enggau rega timpuh panjai ungkup nengeri sereta rayat ditu,” ku iya.

Iya madah munyi nya ba pengawa nyain kontrak entara PTTEP Sarawak Oil Limited enggau Brooke Holding Sdn Bhd (BHSB) ungkup Projek Platform Pemansut Sirung di siti hotel tebilang, ditu kena Hari Dua.

Premier Sarawak mega madah, asil ari projek kuasa ulih diperanak baru ba pemansang mensia mayuh baka jalai, jematan, sistem bekal ai, infrastruktur kuasa karan, sekula, klinik, rentayan digital enggau program bantu rama.

Iya mega madah, pemansang tu mega ulih rembus jauh agi ari kandang menua pesisir Sarawak lalu terus negap pelajar, pengerai enggau ngenatai servis mensia mayuh ti andal enggau meruan agi.

“Lebuh aku nerang ke projek baka Sirung meri pemaik ngagai Sarawak, tu ukai mai reti semina ba gaya ekonomi petroleum aja.

“Pekara ku aku tu ari sukut jalai ti digaga, genturung pendiau ti disambung, nembiak ti dibantu, servis ti dikemanah enggau peluang ti disedia,” ku iya.

Iya madah baru, nengah Skim Pelajar Tinggi Nadai Bebayar (FTES) Sarawak deka terus nempa pengereja landik dikena nyukung industri strategik nyengkaum kuasa, minyak enggau gas sereta teknologi pemadu maju. - EDISI UKAS

Pemberita : Ahmad Daniel Faiz
Gambar: Ibanez Jeffery