Lawas Diselinting Nyadi Palan Ekonomi Enggau Pemansang Utara Sarawak
LAWAS: Lawas terus disungkak nyadi palan pemansang ekonomi enggau pemansang baru adap utara Sarawak nengah bemacham projek strategik baka infrastruktur, pelajar enggau pemansang industri.
Sapit Premier Sarawak, Datuk Amar Awang Tengah Ali Hasan madah, Lawas bisi pengulih besai dikemansang nyadi hab pemansang dudi hari nyengkaum ba sektor ekonomi baru, pemansang pengelandik enggau pengawa meranak puku industri.
Ku iya, Perintah Sarawak diatu ransing bejalaika bemacham projek pemansang nyengkaum rentayan jalai, jematan, palan komersial, padang bilun baru, palan penyangkai kapal sereta palan industri dikena nyendia mayuh agi peluang ekonomi ngagai rayat.
“Perintah Sarawak mega terus meri perati ngagai pemansang pelajar nyengkaum bantu pelajar, palan pemansang pengelandik enggau pelajar tinggi pechuma dikena nempa rebak bepenemu enggau landik,” terang iya.
Iya madah munyi nya ba Pengawa Nyua Geran Projek Mit Pemansang Menua Pesisir (MRP) enggau Bantu Insentif Nembiak di Roxy Hotel kena Hari Satu.
Ku iya, pemansang Lawas meseti mansang nipak pemansang modal mensia nentuka rayat kelebih agi raban nembiak ulih ngena peluang ekonomi ti ditumbuh perintah.
Iya mega madah, rebak biak meseti sedia napi pemar ekonomi dudi hari enggau ngerebut peluang ba bidang dagang, ekonomi digital enggau teknologi moden.
Nambah ke nya, iya mega ngingatka apai indai semampai matau anak ngambi enda tepejuh enggau penyalah rama sereta salah guna dadah ti ulih ngeruga pengidup rebak biak dudi hari.
Pia mega, bisi 19 nembiak nyulut Sijil Pelajaran Malaysia (SPM) Pelilih Lawas 2025 enggau 82 penerima insentif nerima bantu kelai ngena penyulut akademik sida.
Bela datai, Kaban Parlimen Lawas Dato Henry Sum Agong, Direktor Wilayah Northern Region Development Agency (NRDA) Datu Ubaidillah Abdul Latip, Residen Bagi Menua Limbang Unus Tambi, Sekretari Politik Premier Sarawak, Awangku Jinal Abedin Pengiran Jawa, Pegawai Pelilih Lawas Ladin Atok sereta tuai opis. - EDISI UKAS
