KUCHING: Kaunsil Atur Penguna Menua (MTPN) ngatur penemuai basa ngagai Unit Komunikasi Awam Sarawak (UKAS) ngambi berandauka pengulih kerejasama strategik dikena nambah pengeleda sereta nyaga hak penguna di Sarawak.

Penatai deligit MTPN diulu ke Tuai MTPN Wilayah Sarawak, Lucas Lau begulai enggau bala tuai biro MTPN diambat Direktor UKAS Awang Putrayusrie Awang Redzuan di indu opis UKAS, Begunan Baitul Makmur, ditu kena Hari Dua.

Ba randau nya, MTPN mega nerang ke pangku pengawa organisasyen nya nyadi pelasar negi hak penguna nengah mutar sebana, nambah penemu bekaul hak penguna, jematan komunikasyen entara penguna enggau agensi bekaul sereta bejalaika setipikit enggau matau.

Ku raban MTPN, inisiatif kolaboratif begulai enggau UKAS beguna endar nentuka pengawa ngenatai penerang bekaul penguna ulih dikenatai nemban agi ngagai mensia mayuh kelebih agi ba menua pesisir enggau menua ulu Sarawak.

Kerejasama strategik entara kededua raban mega ulih ngerembai program advokasi penguna sereta nambah pengeleda mensia mayuh bekaul isu nyadi penguna.

Nangkan nya, Awang Putrayusrie mega nerima manah penemuai nya lalu ngarap kaul ti ditanggam ulih ngerandang pengawa ngemujur bemacham inisiatif begulai ti meri pemaik ngagai rayat.

Randau nya mega nyadi pelasar berandau tumu dikena ngelala kerejasama ti ulih ditanggam dudi hari nyengkaum program pelajar penguna enggau kimpin meri pengeleda mensia mayuh di Sarawak. - EDISI UKAS

Pemberita : Mia Amira
Gambar : Shahril Haqim