BETONG: Klinik Pengerai Nanga Mujau nerima agih belanja sepenyampau RM50,000 dikena nyeruri sistem bekal ai paip bukit klinik nya.

Kaban Parlimen Betong, Dato Dr Richard Rapu madah, tuju ngagihka belanja ngagai klinik pengerai nya dikena nambah pengelantang peranak ti datai kia kelebih agi ba sukut servis pengerai.

Iya nyemetak madah, fasiliti pengerai menua pesisir meseti terus ditegap berindik ari endur nya beguna endar dikena berubat sereta nyendia penerang pengerai ngagai mensia mayuh.

"Klinik Pengerai Nanga Mujau mega nyadi jematan ngenatai penerang pengerai pemadu baru ari Opis Menteri Pengerai Malaysia ngagai mensia mayuh ba kandang menua pesisir,” ku iya.

Iya nyebut jaku nya lebuh Pengerami Makai Lemai Mantar Gawai 2026 diatur Panel Penyanding Penemu Klinik Pengerai Nanga Mujau di Rumah Panjai Nanga Mujau, Spak, ditu kena Hari Empat.

Dato Dr Richard mega ngingatka mensia mayuh siru agi ke tikas pengerai diri berindik ari kes Penyakit Enda Berampit (NCD) majak nambah ba rayat.

Ba pengerami nya, iya mega ngemendar agih belanja RM5,000 ngagai Panel Penyanding Penemu Klinik Pengerai Nanga Mujau sereta RM2,000 ungkup Rumah Panjai Nanga Mujau ti nyadi tuai rumah ngatur program nya.

Dato Dr Richard mega nyuaka agih belanja Projek Mit Pemansang Menua Pesisir (MRP) sepenyampau RM51,000 ngagai Komiti Pemansang enggau Pengelikun Genturung Pendiau (JKKK) ngaul 14 rumah panjai dia.

Bela datai, pengari Pegawai Pengerai Bagi Menua Betong Chase Miqael Kiri, Penulung Pegawai Perubat Menguasa Klinik Pengerai Nanga Mujau Wilson Wong Yew Jing, Chairperson Panel Penyanding Penemu Klinik Pengerai Nanga Mujau Melina Enduya, Penghulu Sitak Spak Ajang Tibu, Kaunsilor Jantie Miai sereta Tuai Rumah Isup Iba.-EDISI UKAS