BETONG: Apai indai meseti sedia nyikap diri ngena penemu enggau pengelandik teknologi pemadah nentuka sida ulih ngembing sereta matau pemansang anak ba jeman digital kemaya hari.

Sapit Menteri Nembiak, Lumba enggau Pemansang Orang Dagang Sarawak ti mega Kaban Kunsil Nengeri (ADUN) Layar, Datuk Gerald Rentap Jabu madah, ubah pemansang deras ba teknologi pemadah enggau komunikasyen begunaka apai indai nemu sereta mereti ke agi chara ngena internet enggau media rama.

“Seraris enggau pemansang teknologi pemadah sereta komunikasyen ti majak moden, apai indai meseti nyikap diri enggau pengelandik ngena internet nyengkaum ngiga penerang nengah Google dikena nyaup matau sereta ngembing anak,” ku iya.

Iya nyebut jaku nya ba Pengerami Nutup Program Pangku Pengawa Apai Indai Nyadi Raban Gawa Ba Luan ‘Nyelamat Anak Nyadi Pewaris Menua’ di Masjid Jamek Betong, kena Hari Enam.

Ku Datuk Gerald, kasih sayau enggau pengibuh apai indai beguna endar dikena nempa pemanah ulah anak taja pen apai indai kiruh gawa.

“Institusyen ruang bilik beguna amat laban ba rumah mih anak meruan ngasai ke kasih sayau,” ku iya.

Nambah ke nya, iya nyemetak madah ke institusyen ruang bilik ti entap ulih nyadi sapat nyaga raban nembiak ari tepejuh ngagai penyalah rama baka gengsterisme, pornografi, salah guna vape enggau dadah.

Nangkan nya, Kaban Parlimen Betong, Dato Dr Richard Rapu madah ke pemansang menua kebendar bepun ari institusyen ruang bilik enggau diseridi ba rumah.

Ku iya, rebak biak kemaya hari napi pemar rama ti jauh kompleks agi dibanding 50 taun ti udah nyengkaum gian video games online, lumba enda beradat enggau mayuh aktiviti negatif ti ulih ngenyai runding enggau ulah.

“Anak kemaya hari mudah tepejuh enggau pekara negatif nyema pengawa ngena teknologi enggau media rama enda dipatau rat,” ku iya.

Berebak enggau nya, iya ngarap apai indai ulih bejalaika pangku pengawa terit agi maya matau baka anak ngena telefon pintar enggau media rama kelebih agi sida ti agi biak.

Program diatur One Stop Committee (OSC) Opis Pelilih Betong enggau kerejasama PEMADAM Pelilih Betong enggau KMKK Kampung Melayu Betong nya digulu 72 apai indai begulai enggau bala anak ari enam genturung pendiau Melayu ngelingi Betong. - EDISI UKAS