LUBOK ANTU: Pengerami Makai Lemai Mantar Gawai Pelilih Lubok Antu 2026 richah enggau penatai mensia mayuh sereta tuai nengeri nengah penuh adat enggau main asal nyerumba pengerami Gawai Dayak.
Sapit Menteri Dagang Antarabansa, Industri enggau Pengawa Meranak Puku Sarawak, Datuk Dr Malcolm Mussen Lamoh berasai gagit ulih begulai enggau komuniti di Lubok Antu nyerumba Gawai kelimpah nyempil kaul enggau mensia mayuh.
Iya mega nyukung inisiatif pemansang kandang menua pesisir sereta ngubah tikas idup komuniti ba menua ulu enggau tebing tasik.
“Ekonomi Sarawak diatu majak maju lalu rayat meseti begulai nyaga semua fasiliti sereta pemansang ti udah disediaka ungkup pemansang nengeri,” ku iya ba pengerami nya di Balai Kompleks Lumba Lubok Antu, kena Hari Enam.
Pengerami nya richah enggau pemerindang‘Gendang Pampat’ ari Gerempung Main Asal Iban Batang Ai kelimpah pemerindang ngajat ari raban La Ngindang Lubok Antu ti narit ati bala temuai ti bisi datai.
Malam nya mega bisi ngatur Pekit Kumang Gawai Pelilih Lubok Antu 2026 ti mandangka lapan finalis.
Gelar Kumang Gawai Pelilih Lubok Antu 2026 dipenggi Aguilera Nita Eugenie Berjaya ari Tawai, Engkilili lalu mai pulai perais mata duit RM8,000, trofi, bungai jari, setipikit enggau selampai.
Penuduk kedua diempu Dyra Marcella Nickson Luta ari Merindun ti nerima RM5,000 sereta trofi, bungai jari, setipikit enggau selampai.
Lalu penuduk ketiga diempu Cynthia Chong Tze Yie ari Selindung Ulu ti mai pulai perais mata duit RM5,000 begulai enggau trofi, bungai jari, setipikit enggau selampai.
Kelimpah ari nya, gelar ‘King of Night’ diempu Father Afron Gorie ti tampak gak ngena pekayan asal Bidayuh lalu mai pulai perais mata duit RM500 sereta trofi. - EDISI UKAS
