SARIKEI: Projek ngaga jalai ari Jemoreng ke Pasin diatu lanchar lalu dulu ari taga asal kelimpah meri kelai positif ngagai pengawa negap rentayan penyambung menua pesisir.

Kaban Kunsil Nengeri (ADUN) Daro, Dr Safiee Ahmad madah, projek nya ditaga tembu Mac taun baru lalu nyadi penyungkak besai ngagai pemansang sosioekonomi komuniti menua.

Ku iya, projek jalai nya siginifikan amat berindik ari Pasin sebedau tu semina ulih dilawa ngena jalai ai ti begunaka awak urung dua jam ari Sibu.

“Pengudah projek tu tembu ila, jalai sepanjai 16 kilometer nyengkaum jalai spur sepanjai 17 kilometer deka nentuka Pasin badu agi dikumbai entigis.

“Naka diatu, pejalai projek tu dulu ari taga lalu kitai andal ke nya ulih digaga nitih perambu,” ku iya.

Iya nyebut jaku nya ngagai pemberita pengudah ngulu Pengawa Nyua Chek Pampas Tanah di Palan Opis Perintah Sarawak (IAC) Bagi Menua Sarikei kena Hari Lima sebedau ngatur pengawa ngabas pejalai projek nya di Pasin.

Ku Dr Safiee, pemansang infrastruktur nya deka meri pemaik terus ngagai urung 2,500 peranak di Pasin ti ngelama tu bepanggai ngagai pengangkut sungai ungkup ngereja pengawa ninting hari.

Ku iya, Pasin ti bisi lapan rumah panjai sereta siti klinik enggau sekula ti deka ngasai ke pemaik besai ari jalai baru nya.

Iya madah baru, akses ti menyana agi ngagai fasiliti pelajar, pengerai enggau aktiviti ekonomi dikeandal ulih nambah kualiti idup peranak menua.

“Projek tu ukai semina ngemuntang pejalai tang mega nyendia peluang ngagai ekonomi enggau pekara rama tumbuh meruan agi ngagai komuniti menua pesisir,” terang iya. - EDISI UKAS