BETONG: Kaul rat entara komuniti enggau gerempung ukai dikuasa perintah (NGO) terus nentuka bemacham bantu diagih ngagai raban ti begunaka bantu kelebih agi nyerumba musin pengerami.

Sapit Menteri Nembiak, Lumba enggau Pemansang Orang Dagang Sarawak ti mega Kaban Kunsil Nengeri (ADUN) Layar Datuk Gerald Rentap Jabu madah, komuniti di Betong chukup betuah laban bemacham bantu diberi ninting taun asil kerejasama rat entara komuniti enggau NGO dia.

“Komuniti kitai di Betong chukup betuah laban komuniti enda kala beserara enggau NGO laban ninting taun bemacham bantu diberi baka nyerumba musin pengerami,” ku iya nya Program Sejambak Kasih Pengerami Gawai Taun 2026 Bagi Menua Betong di Balai Che Zhong Khor, ditu kena Hari Enam.

Nangkan nya, Kaban Parlimen Betong Dato Dr Richard Rapu ngelalau mensia mayuh terus nyaga penyerakup ti diasai ke serap komuniti dia kelebih agi maya musin pengerami.

Ku iya, bida raban bansa ukai nyadi penekul peranak di Betong begulai ngintu pengerami enggau lantang sereta richah.

Ba pengawa nya, bisi 100 penerima nerima mata duit RM100 sereta hamper pengerami berega RM80 ari Opis Pengintu Pengelantang Komuniti Bagi Menua Betong.

Seraya , 100 da penerima nerima pemeri RM100 begulai enggau lima kilogram berau enggau dua piket minyak makai ari Gerempung Mulaika Pemanah Ulah Che Zhong Khor nengah kerejasama SABERKAS Pampang Layar.

Ba pengawa nya, Datuk Gerald mega nyuaka chek Projek Mit Pemansang Menua Pesisir (MRP) sepenyampau RM212,000 ngagai enam gerempung komuniti China di Betong.

Entara penerima bantu MRP iya nya Gerempung Mulaika Pemanah Ulah Che Zhong Khor, Gerempung Fu Sheng Gong, Board of Management Chua Hua School, Gerempung Shen Tang Gong, Betong Chinese Temple Charitable Trust enggau Betong Buddhist Society.

Bela datai, Residen Bagi Menua Betong Datu Richard Michael Abunawas, Pegawai Pengintu Pengelantang Komuniti Bagi Menua Betong Abg. Ahmad Ibrahim Abg. Abdul Rahman, Chairman Gerempung Mulaika Pemanah Ulah Che Zhong Khor Chan Chu Chu, Penguasa Tanah enggau Survei Bagi Menua Betong TPr Moris Nayup sereta Temenggung China Bagi Menua Betong Kueh Tu Teck.-EDISI UKAS