KUCHING: Pengawa ngatur Borneo Island International Big Bike Festival (BIIBBF) Ke-24 terus nyadi pelasar beguna negut semangat sebakih enggau solidariti komuniti penepan motosikal besai di rantau Borneo.

Direktor Dewan Bandaraya Kuching Utara (DBKU), Ramzi Abdillah madah, festival nya ukai semina ngempuru komuniti peminat motosikal besai, tang mega mandangka penegut kaul sereta semangat begulai entara penyereta ari Sarawak, Sabah, Brunei, Labuan enggau Kalimantan, Indonesia.

Ku iya semangat penyerakup ti dipandang nengah festival nya beguna endar maya dunya majak napi pemar kemaya hari tu.

“Pekara ti ulih dipeda iya nya kaul sebakih ti majak rat entara komuniti bikers ari selampur Borneo.

“Taja dunya betapi bemacham konflik enggau penyarut, komuniti di Pulau Borneo agi ulih mandangka semangat solidariti enggau penyerakup,” ku iya serimbai festival nya.

Iya madah munyi nya ba Pengerami Makai Lemai Gala di Waterfront, Kuching kena Hari Enam.

Pengerami nya mega richah nengah pemandang montaj 24th BIIBBF 2026, gimik nyuaka tambai BIIBBF 2027 ngagai Presiden LA Riders Club Labuan, Dato Mohd Rafi Alli Hassan sereta nyuaka momento ngagai lima kelab besai Borneo nyerangkung Brunei, Sarawak, Indonesia, Labuan enggau Sabah.

Pengawa ngatur festival pengelama 24 taun chara konsisten nya mega nunjukka penau Sarawak nyadi tuai rumah pengawa betikas antarabansa sereta ulih ngeranchak industri dagang temuai enggau lumba motor nengeri.

Penatai penyereta enggau pengusung ari mayuh menua dipeda meri empas positif ngagai sektor hotel, pemakai enggau pengangkut di Sarawak seraya nyaup ngelaku nengeri tu nyadi palan dagang temuai ti nyelai enggau likun.

Nambah ke nya, semua penyereta mega dipinta semampai ngemerat pengelikun jalai enggau nitih ke atur undang-undang sereta nyaga nama komuniti motosikal besai.

Festival nya mega dipeda ukai semina nyadi pelasar ngempuru peminat motosikal besai, tang mega mai pesan bebakih, disiplin, semangat beraban enggau gaya idup bepengerai ti patut ditarak ngagai rebak biak.

Bela datai, Presiden Sabah Big Bikers Association (SBBA) Sabah, Datuk Osman Ahmed, Presiden LA Riders Club Wilayah Persekutuan Labuan, Dato Mohd Rafi Alli Hassan, Yang Dipertua Gerempung Motosikal Darussalam (PEMODA) Brunei Darussalam, Pengiran Redzuan Pengiran Ahmad, Presiden Borneo Island Big Bikers (BIBB) Sarawak, Ramlee Tuah sereta Presiden Ikatan Motor Besai Indonesia (IMBI) Kalimantan, Jailani Abang Zainuddin.- EDISI UKAS

Pemberita : Ezzah Syafiqah
Gambar : Ezzah Syafiqah