KUALA LUMPUR: Johor Darul Ta'zim (JDT) ngenap pemujur quadruple musin tu lebuh nyadi champion Piala Malaysia 2025/2026 pengudah ngalahka Kuching City FC (KCFC) 2-0 ba pekit kepenudi di Stadium Nasional Bukit Jalil, ditu malam tadi.

Gol keterubah tim Harimau Selatan disipak Marcos Guilherme De Almeida ba minit ke-80 lebuh nyipak bol ba sukut kanan gawang KCFC dikena ngalahka Haziq Nadzli.

Pemain pemadu manah, Arif Aiman Hanapi majak ngalahka KCFC lebuh nyipak gol kedua ba minit ke-90 ngujungka JDT nempa penyulut.

Tu nambah gelar champion keenam kali ngagai JDT pengudah belabuh ngempu Piala Malaysia ba taun 2017.

JDT mega menang Piala Sumbangsih, Piala FA enggau Liga Super musin tu.

Lebih 50,000 penyukung nedatka Stadium Nasional Bukit Jalil gagit meda dua tim bemain pengudah wisel disepu.

JDT nyau deka bulih gol keterubah ba minit ke-12 tang sipak penyerang prolifik, Bergson Gustavo dikinsil referee Qatar, Mohammed Ahmed Al-Shammari ketegal ngereja penyalah kasar enggau pemain KCFC.

Tim 'The Cats' diembing Aidil Sharin Sahak ngalus ke agi chara bemain lalu nyau deka bulih gol ba minit ke-19 tang sipak Joao Pedro puntan disambung Muhammad Ramadhan Saifullah.
Minit ke-60, KCFC diberi sipak penalti pengudah Ramadhan bulih kutak penalti.

Taja pia, peluang nya puntan dikemujur Ramadhan.

Sekeda gaya dikena Jerome Etame enggau Petrus Shitembi mega puntan tama gawang JDT ti dijaga rat goalkeeper.

Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg, Sapit Menteri Besai Datuk Amar Fadillah Yusof sereta sekeda menteri enggau sapit menteri kabinet Sarawak enggau Perintah Besai mega bisi meda pekit final malam tadi.

Iya mega diberi basa nyuaka perais ngagai pemain KCFC.

Taja alah, nya tetap pemujur ngemegah ati ngagai KCFC sepanjai Liga Malaysia taun tu pengudah bulih penuduk kedua Liga Super 2025/2026 enggau ulih ngagai Liga Juara-Juara Asia 2 taun baru. - EDISI UKAS