MIRI: Gawai Dayak Bazar enggau Festival Ethnocultural 2026 di Miri nempa pemujur pengudah ngerikod lebih 82,300 pengusung sereta asil manggai RM2.2 juta naka 22 Mei tu tadi.

Sapit Menteri Pengerai Mensia Mayuh, Pengawa Berumah enggau Perintah Lokal Sarawak ti mega Chairman Komiti Pengatur Pengerami Ngintu Gawai Dayak Renggat Sarawak 2026, Datuk Dr Penguang Manggil madah, pemujur nya ngelui selinting tumu RM1.8 juta seraya nunjukka timbal ti chukup manah ari mensia mayuh bekaul festival nya.

Ku iya, taja bazar sekali tu semina nyendia 72 bansal, tang timbal ari bala pengusung tetap richah enggau penatai beribu iku ninting malam.

“Chara pukulrata, urung 3,000 pengusung datai ninting malam bebeli ke pemakai sereta meda pemerindang ti diatur.

“Asil mega ngelui selinting tumu RM1.8 juta pengudah mujur bulih RM2.2 juta naka 22 Mei,” ku iya.

Datuk Dr Penguang mega madah, pengawa ngatur bazar nya ukai semina nyaup nambah penatai pemisi pedagang mit enggau pedagang lokal, tang mega nyadi nyadi pelasar beguna nyaga budaya raban bansa Dayak nengah bemacham pemerindang enggau pekit asal.

“Tu siti ari chara nentuka budaya kitai enda punas disegang arus pemansang jeman,” ku iya nyemetak.

Iya madah baru, sida mega udah berandau enggau Datuk Bandar Miri, Adam Yii Siew Sang ngambi masuk ke Bazaar Gawai ba kalinda rasmi Festival Mayfest dudi hari nentuka pengawa nya ulih diatur ninting taun.

Festival ti diatur kenyau ari 4 Mei tu tadi mandangka urung 12 aktiviti main asal ngari ke mayuh suku etnik Dayak di Miri nyengkaum Pekit Kumang Gawai Dayak, betabuh, Dayang Sangon enggau kuntau.

Bela datai, Menteri Pengangkut Sarawak, Dato Sri Lee Kim Shin, Datuk Bandar Miri ti mega Kaban Kunsil Nengeri (ADUN) Pujut, Adam Yii Siew Sang sereta Residen Bagi Menua Miri, Galong Luang. - EDISI UKAS