BINTULU: Tuai Raban Bansa enggau Tuai Komuniti (KMKK) dipinta ransing agi mangku pengawa nyadi tiang nentuka adat enggau budaya komuniti Dayak terus dijaga sereta enda lenyau disegang arus pemansang moden.
Menteri ba Opis Premier Sarawak, Dato Sri John Sikie Tayai madah, tanggungpengawa KMKK ukai semina nyadi jematan mutar isu enggau sebana rayat tang mega meseti nyadi penyaga pesaka budaya komuniti Dayak.
Ku iya, rebak biak diatu meseti terus diajar enggau adat asal baka ‘miring’ enggau seni ‘bebiau’ ti majak kurang dipereti enggau dikemeran ba pengidup besehari-sehari.
“Taja komuniti diatu idup ba arus pemansang moden, adat ‘miring’ tetap meseti dijaga laban nya pesaka budaya ti nyadi identiti komuniti Dayak kenyau ari aki ini kitai kelia,” ku iya lebuh Pengerami Mantar Gawai Dayak Renggat Pelilih Tatau 2026 di Restoran Dinnerworld, Tatau, kena Hari Dua.
Ku iya, agi mayuh rebak biak ti enda mereti ke rurun adat miring enggau betul nyengkaum ripih piring enggau atur pengawa ti patut dikemeran.
Iya mega irau ke pengawa kurang ngereja seni asal baka bebiau ti mega nyadi pesaka budaya besai reti komuniti Dayak ti meseti ditan belama.
Ba pengerami nya, Dato Sri John Sikie ti mega Kaban Kunsil Nengeri (ADUN) Kakus nyua insentif pelajar sepenyampau RM18,100 ngagai 26 nembiak ari Kunsil Nengeri (DUN) Kakus ti bulih pemutus 6A enggau lebih ari nya nyadi peransang penyulut akademik.
Bela datai, Sapit Menteri Infrastruktur enggau Pemansang Penyangkai Kapal Sarawak Datuk Majang Renggi, Sapit Menteri Utiliti enggau Telekomunikasyen Sarawak Datuk Liwan Lagang, Kaban Parlimen Selangau Edwin Banta, ADUN Jepak Iskandar Turkee, Residen Bagi Menua Bintulu, Datu Nyurak Keti sereta Pegawai Pelilih Tatau Calvin Ligong Bujang @ Endawie. - EDISI UKAS
