BETONG: Bagi Menua Betong deka ditapat bala pengusung ba selampur Sarawak pengudah dipilih nyadi tuai rumah ngintu Hari Pengada Kebawah Duli Yang Maha Mulia Seri Paduka Baginda Yang di-Pertuan Agong XVII Renggat Sarawak 2026 ti deka diatur pengelama empat hari, belabuh ari 11 nyentuk 14 June tu.

Menteri ba Opis Premier Sarawak ti mega Menteri Beempu Tanggungpengawa ungkup pengerami nya, Dato Sri John Sikie Tayai madah, hari besai nya ukai semina kelai basa enggau penaluk rayat ngagai Yang di-Pertuan Agong ti nyadi Tuai Menua, tang mega dikena narak semangat taluk ke menua enggau penyerakup rayat pupu bansa ba nengeri tu.

“Tu dikena narak semangat taluk ke menua enggau tuai pemadu tinggi menua kitai iya nya ti mai pengelikun, pengelantang enggau penyerakup rayat di Malaysia enggau kelebih agi kitai di Sarawak ditu,” ku iya.

Iya madah munyi nya ba aum pemberita pengudah Aum Penyeraris Komiti Besai Pengerami Ngintu Hari Pengada Kebawah Duli Yang Maha Mulia Seri Paduka Baginda Yang di-Pertuan Agong XVII Renggat Sarawak 2026 Bil.2/2026 di Opis Residen Bagi Menua Betong kena Hari Satu.

Ku iya agi, tujuh aktiviti besai udah dilanggur dikena ngempuru mensia mayuh enggau lantang sereta semangat taluk ke menua.

Entara aktiviti besai iya nya Pemandang Raja Kitai ti diatur ari 11 nyentuk 14 June ba pelaman Balai Lumba Tan Sri Datuk Amar Stephen Kalong Ningkan ti mandangka sejarah sereta pangku pengawa institusyen Yang di-Pertuan Agong ba sistem pemerintah menua.

Bisi mega diatur iya nya Betong Kitchen, festival pemakai ti ngenah mayuh pemakai asal dikena ngelaku pesaka kulinari komuniti menua.

Kena 12 June, khutbah khas serimbai hari besai nya deka dikenatai ba masejit selampur Sarawak enggau isi bekaul penyerakup, pengelantang enggau penaluk ngagai tuai.

Nangkan nya, kena 13 June deka diatur Pengawa Makai Selamat Unit Pekara Pengarap Bukai (UNIFOR) ba Balai Panglima Rentap ti ngempuru pengari bemacham pengarap nyadi lambang pengelantang rayat Sarawak.

Pengawa nya deka dipenyadi Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg.

Ba hari sama, bisi mega diatur Pengawa Makai Selamat di Masjid Jamek Betong ti deka digulu Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar begulai enggau bini, Toh Puan Datuk Patinggi Fauziah Mohd Sanusi.

Pengawa deka ditampung kena 14 June enggau Pengawa Ngirup Teh di Balai Lumba Tan Sri Datuk Amar Stephen Kalong Ningkan ti ngempuru tuai, orang gawa perintah enggau mensia mayuh.

Muak ke malam, Konsert Rayat deka nyadi pengawa nutup pengerami nya enggau pemerindang artis lokal, pemerindang main asal sereta mandangka bungai api.

Bela datai ba aum pemberita iya nya Sapit Menteri Nembiak, Lumba enggau Pemansang Orang Dagang Sarawak, Datuk Gerald Rentap Jabu, Sapit Menteri Pemansang Indu, Nembiak Mit enggau Pengelantang Komuniti Sarawak Datuk Mohammad Razi Sitam, Sapit Menteri Dagang Temuai, Industri Kreatif enggau Seni Pemerindang Sarawak Datuk Snowdan Lawan, Sapit Menteri Dagang Antarabansa, Industri enggau Pengawa Meranak Puku Sarawak Datuk Dr Malcom Mussen Lamoh, Direktor Unit Protokol, Istiadat enggau Atur Pengawa Sarawak Datu Hamdan Sharbini sereta Residen Bagi Menua Betong Datu Richard Michael Abunawas. - EDISI UKAS