SARIKEI: Pengerami Gawai Dayak ukai semina pengerami ninting taun komuniti Dayak, tang mega nyadi lambang peneguh kaul diri sebilik, komuniti enggau ngenang pesaka budaya ti ditampung kenyau ari aki ini kitai kelia.

Sapit Menteri Pengawa Bekebun Bedandang Besai enggau Komoditi ti mega Kaban Parlimen Sarikei, Dato’ Sri Huang Tiong Sii madah, pengerami nya nyadi pelasar beguna negap penyerakup rayat pupu bansa di Sarawak.

“Malam tu, kitai ukai semina serumpu makai lemai, tang mega begempuru nyadi siti ruang bilik besai ti ngenang pesaka asal sereta narak semangat beserakup,” ku iya.

Iya madah munyi nya ba Pengerami Makai Lemai Mantar Gawai Dayak 2026 diatur Gerempung Tuai Rumah Pelilih Meradong ti diatur di Christus Lumen Mundi Hall, kena Hari Enam.

Ku iya ti mega Kaban Kunsil Nengeri (ADUN) Repok, Gawai awak mensia mayuh beterima kasih ke jereki enggau asil ketau ti diberi Petara.

Ku iya, Pengerami Gawai engkeman enggau semangat ruang bilik lebuh diri sebilik ti jauh pulai ke rumah panjai begempuru enggau kaban belayan.

Ku iya agi, pengawa baka nya nentuka Pengerami Gawai bisi pengelain laban ulih negut kaul entara komuniti sereta narak reti penyerakup dalam komuniti.

Nambah ke nya, iya mega ngelalau raban nembiak terus nyaga adat enggau budaya pesaka asal komuniti Dayak ngambi enda punas disegang arus pemansang jeman.

“Nuju bala nembiak, kita mih nampung budaya tu. Lebuh kita ngajar, bejaku ngena jaku asal enggau mereti ke tetiap pengawa begawai, kebendar kita benung nentuka pesaka tu terus idup,” ku iya baru.

Ba pengawa nya, iya mega nyuaka pemeri RM40,000 dikena nyukung aktiviti ninting taun sereta program Gerempung Tuai Rumah Pelilih Meradong. - EDISI UKAS