KAPIT: Kapit Cultural Festival (KCF) 2026 Edisyen 4.0 mujur diatur enggau richah di Kapit Town Square kena Hari Minggu lalu mandangka pengeran komuniti enggau tuai menua nyaga pesaka budaya sereta negap identiti rayat pupu bansa di Bagi Menua Kapit.
Sapit Menteri ba Opis Premier Sarawak (Undang-Undang enggau Adat Bumiputera) ti mega Kaban Kunsil Nengeri (ADUN) Bukit Goram Datuk Jefferson Jamit Unyat madah, KCF nya pelasar beguna nentuka adat enggau budaya komuniti Iban terus dijaga sereta ditampung ngagai rebak biak.
“Festival tu ukai semina nyadi pelasar mandangka adat asal baka ngajat, krafjari enggau bebiau, tang mega ngerapit kaul entara komuniti rumah panjai sereta nyaup nambah ekonomi menua nengah asil keranjai jari mensia mayuh,” ku iya ba pengawa nangguh nya.
Ku iya agi, festival nya mega ulih nyadi dokumentasyen idup nentuka identiti raban bansa Iban enda lenyau taja napi arus pemansang moden.
Iya mega ngarap KCF ulih ditampung nyadi aktiviti ninting taun di Kapit dudi hari berindik ari pemanah timbal ari serap komuniti.
Nangkan nya, Pegawai Pelilih Kapit ti mega Pengatur KCF 2026 Thomas Geoffrey Kandawang meri terima kasih ngagai semua raban ti udah ngemujur festival nya.
Ku iya, dua aktiviti besai KCF 2026 iya nya Pengawa Bejalai Beraban Niti Daun enggau Pekit Kumang Dayak (Iban) mujur matak penyereta sereta timbal ari komuniti menua enggau pengusung luar.
Iya mega nyemetak madah ke pengawa ngangkatka baru KCF nengah sulu jaku “Segulai Sejalai” mandangka semangat kerejasama rat entara agensi perintah, gerempung ukai dikuasa perintah sereta komuniti menua ngemujur festival nya.
Pengerami nya mega richah enggau pengawa nyua setipikit ngenang jasa ngagai tiga ex-penghulu enggau meri tawak teringa, ngenang bala Lemambang enggau Tukang Biau Pelilih Kapit sereta nembiak praktikal Opis Pelilih Kapit kelai jasa nyagu adat enggau pesaka budaya.
Pia mega, bala pengusung diperindang enggau pekit kepenudi Pekit Kumang Dayak (Iban) KCF 2026, pemerindang ari bala artis sereta pengawa nyua perais ngagai bala pemenang.
Bela datai, Sapit Menteri Digital ti mega Kaban Parlimen Hulu Rajang Datuk Wilson Ugak Kumbong, ADUN Pelagus Wilson Nyabong Ijang sereta ADUN Baleh Nicholas Kudi Jantai. - EDISI UKAS
