Ahli Dewan Negara Senator Michael Mujah Ilhan madah, program lumba nya ukai semina nyadi pelasar ngansah penau tang mega ulih nyempil kaul enggau semangat kerejasama dalam komuniti.
“Pengawa ngatur program baka tu ukai semina nyadi pelasar negap penyerakup komuniti kelimpah narak gaya idup bepengerai entara komuniti menua,” ku iya.
Iya madah munyi nya ba Pengawa Nangguh Karnival Lumba PKS Pampang Belaga ba Ruai Maren Uma, Uma Kahei, Long Mekero, kena Hari Minggu.
Karnival keterubah nya diatur pengelama tiga hari, belabuh ari 22 nyentuk 24 Mei nengah pekit main bol semilan sepiak lelaki enggau bola tampar indu.
Bisi 14 tim ngulu pekit main bol semilan sepiak seraya lapan tim ngambi bagi ba bola tampar indu.
Ungkup aktiviti main bol, tim Menapa Sukat FC nyadi champion dientudi KRT Pasar Belaga bulih penuduk kedua enggau Belagan United ba penuduk ketiga.
Nangkan nya, tim Amo Manis nyadi champion bola tampar indu, ditangkan UALD bulih penuduk kedua lalu Happy-Happy VT ngempu penuduk ketiga. - EDISI UKAS
