KAPIT: Pekit Kumang Dayak (Iban) serimbai Kapit Cultural Festival (KCF) 2026 richah diatur lalu mujur mandangka pemanah sereta penyelai pesaka budaya komuniti Iban.

Pekit ti diatur di Kapit Town Square kena Hari Minggu ngemata Diana Benjamin dipadu nyadi Kumang seraya mai pulai perais mata duit RM5,000, trofi enggau setipikit.

Pressie Radin ngempu gelar Lulong seraya Joyse Elysa Jantum bulih gelar Selingkar Matahari.

Pengawa nya richah enggau pemerindang artis menua sereta pengawa nyua perais enggau begambar ungkup kenang.

Bela datai, Sapit Menteri Digital ti mega Kaban Parlimen Hulu Rajang Datuk Wilson Ugak Kumbong, Sapit Menteri di Opis Premier Sarawak (Undang-Undang enggau Adat Bumiputera) ti mega Kaban Kunsil Nengeri (ADUN) Bukit Goram Datuk Jefferson Jamit Unyat, ADUN Pelagus Wilson Nyabong Ijang sereta ADUN Baleh Nicholas Kudi Jantai. - EDISI UKAS