Kaban Kunsil Nengeri (ADUN) Julau, Dato Rolland Duat Jubin madah, pejalai entukar ti nambah sepanjai musin pengerami begunaka semua penguns jalai ngambi disiplin, bejimat sereta semampai ngasi ke atur jalai.
“Mayuh ti deka pulai ke rumah panjai ngintu Gawai enggau diri sebilik sereta kaban belayan.
“Nya kebuah, aku deka ngingatka semua semampai bejimat maya deriba enggau nyaga pengelikun diri sereta penumpang,” ku iya lebuh Pengerami Makai Lemai Mantar Gawai diatur Raban Indu N.48 Meluan di Balai Betutup Stadium Julau kena Hari Minggu.
Ku iya, pengawa nagang beguna amat dikena nyeliah penusah enda disadang nyadi nyengkaum penusah aksiden ti ulih ngasuh pengawa gaga bebali nyadi penusah.
“Kitai deka Gawai dirami enggau penuh pengaga, ukai nya bebali nyadi trajedi ketegal penusah aksiden kebendar ulih diseliah,” ku iya.
Iya mega madah, pengerami Gawai ukai semina pengerami ninting taun komuniti Dayak tang mega nyadi pelasar beguna nyempil kaul entara komuniti pupu bansa.
“Program baka tu ukai semina nyempil kaul entara komuniti, tang mega nyadi lambang penyerakup ti meseti terus dijaga ungkup pemansang ti menyana agi,” ku iya.
Iya madah baru, budaya penyerakup enggau bela bebasa ti dikemeran sehari tu patut ditampung rebak biak nentuka Meluan mengkang nyadi komuniti ti likun, seati enggau progresif dudi hari. - EDISI UKAS
