KANOWIT: Program Kenduri Rayat MADANI Mantar Gawai di Kanowit nyadi pelasar beguna negap penyerakup rayat pupu bansa nengah ngintu pengerami enggau lantang sereta richah.

Menteri Penyerakup Bansa, Dato Sri Aaron Ago Dagang madah, atur program nya inisiatif perintah nyempil kaul tuai enggau rayat nengah ngintu pengerami besai rayat di menua tu.

“Sehari tu kitai ba Opis Pelilih Kanowit ngambi begulai enggau rayat ngintu Gawai Dayak.

“Ba opis menteri, kami udah dilempai tanggungpengawa ngatur Mantar Gawai Kenduri Rayat MADANI lalu tu inisiatif perintah nyempil kaul tuai enggau rayat,” kiu iya lebuh dirandau ba program nya di Balai Opis Pelilih Kanowit, kena Hari Minggu.

Ku iya, opis menteri iya dilempai tanggungpengawa ngatur tiga Kenduri Rayat MADANI taun tu ke alai Kanowit nyadi nalan keterubah serimbai Pengerami Gawai Dayak ba Parlimen Kanowit.

Dato Sri Aaron mega madah, program bukai deka diatur di Serian serimbai Hari Malaysia enggau di Sungai Buloh, Selangor serimbai Deepavali.

Bemacham aktiviti diatur sepanjai program nyengkaum Townhall Pengelikun Komuniti Begulai Enggau PEMADAM, reruai beperesa pengerai enggau kimpin meri darah nengah kerejasama Opis Pengerai Pelilih (PKD), slot interaktif kenegaraan ari Akademi Kenegaraan Malaysia (AKM) sereta peneleba bekaul pangku pengawa enggau fasiliti Palan NADI.

Program nya mega ngemata pengawa nyua Bakul Rahmah MADANI ngagai penerima ari raban kurang penatai pemisi ngelingi Kanowit dikena nyaup nyendia diri ngintu Gawai Dayak. - EDISI UKAS