PTTEP, BHSB Nyain Kontrak Ngemansang Platform Pemansut Medan Sirung
KUCHING: PTTEP Sarawak Oil Limited enggau Brooke Holding Sdn Bhd (BHSB) udah nyain kontrak ungkup pengawa nyendia Injiniring, Ngulih enggau Ngaga (EPC) Platform Pemansut Sirung ti diatur ba siti hotel tebilang, ditu kena Hari Dua.
Pengawa nyain kontrak tu udah dikemata Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg lalu pengawa besilih kontrak dipenyadi Sekretari Pekara Wang Sarawak ti mega Chairman BHSB Dato Sri Wan Lizozman Wan Omar enggau Menijar Menua Aset Malaysia, PTTEP Sarawak Oil Limited Vitoon Chaisomboonpan.
Nitih ke penerang, kontrak nya udah diberi ngagai BHSB kena 5 Februari tu tadi lalu ditaga tembu Februari 2028.
Pemansang Medan Sirung nya projek pemansang medan hidrokarbon ba urung 140 kilometer ari kompleks Malaysia Liquefied Natural Gas (MLNG) di Bintulu lalu deka nyukung operasyen mansutka minyak enggau gas di Blok Luar Pesisir SK405B.
Projek nya ngaul urung 8,500 tan metrik komponen 'topside' enggau substruktur, lalu nyadi skop 'topside' enggau substruktur pemadu besai kala dipejalai BHSB ba industri minyak enggau gas.
Ba pengawa nya, BHSB deka ngena limbungan fabrikasyen di Demak Laut ungkup struktur 'Jacket' seraya limbungan besai Sejingkat dikena ngaga 'Topside'.
Nambah pengandal meri kontrak tu, BHSB sebedau tu udah mujur nembuka projek F6-VLAP ungkup Sarawak Shell ba taun 2025 kelimpah projek Platform Kepala Telaga Salbiah ungkup Dialog Group sereta PETRONAS Carigali Sdn Bhd kena Mac 2026.
Kededua projek nya nempa pemujur operasyen signifikan kelebih agi ari sukut pengelikun enggau kualiti sekumbang bejalaika projek.
Kelimpah sektor kuasa, kompeni nya mega mujur nyerahka Muzium Maritim Industri Brooke Dockyard ti diaku nyadi projek keterubah di Malaysia ba pengawa ngintu begunan besi besejarah.
Brooke Holding mega nembuka projek Jematan Batang Saribas sepanjai 1.55 kilometer ungkup Opis Kereja Raya (JKR) Sarawak.
Bela datai, Menteri Utiliti enggau Telekomunikasyen Sarawak Dato Sri Julaihi Narawi, Sapit Menteri Dagang Antarabansa, Industri enggau Pengawa Meranak Puku Sarawak Datuk Dr Malcolm Mussen Lamoh, Sapit Menteri Kuasa enggau Pemeruan Rampa Menua Sarawak Datuk Dr Hazland Abang Hipni sereta temuai dipebasa bukai. - EDISI UKAS
Pemberita : Ahmad Daniel Faiz
Gambar: Ibanez Jeffery
