MIRI: Penegap politik enggau penyerakup rayat terus nyadi peneguh nentuka Sarawak mangku pengawa besai ba Perintah Besai.
Sapit Menteri ba Opis Premier Sarawak (Pengereja Kasar, Imigresyen enggau Patau Projek), Datuk Gerawat Gala madah, Sarawak diatu bisi pangku pengawa Sapit Menteri Besai, Presiden Dewan Negara, lima Menteri penuh enggau lima Sapit Menteri dalam Perintah Besai.
“Laban penegap politik enggau penyerakup rayat, nengeri kitai dibasa enggau diberi pangku pengawa besai ba Perintah Besai,” ku iya bejaku ba Pengerami Mantar Gawai Poyut–Lubok Nibong 2026 di Marudi, kena Hari Minggu.
Ku iya, penegap politik ti diasai ke tu mega nyungkak ekonomi nengeri tumbuh.
“Penatai pemisi nengeri nambah ari urung RM6.5 bilion ba taun 2017 ngagai lebih RM14 bilion ba taun 2025.
“Penegap nentuka tuai nengeri meri perati nyerungkai pemansut penatai pemisi baru,” ku iya.
Nambah ke nya, iya mega madah ke perintah nengeri semampai ngaku pupu bansa sereta meransang tetiap etnik ngetan enggau ngelaku budaya sereta tradisyen sida.
“Pengelantang entara raban bansa ba nengeri tu nyadi chunto ngagai nengeri bukai di Malaysia,” ku iya.
Iya mega madah, bemacham program main asal terus diberi sukung nyengkaum Pengerami Ngintu Gawai Dayak Renggat Nengeri, Baram Regatta, Pengerami Main Asal di Long Lama enggau Pengerami Nukenan di Bario.
Ba pengerami sama, Datuk Gerawat mega ngemendar agih belanja RM20,000 ngagai Komiti Pengatur Mantar Gawai 2026 kelai ngenang pengawa ngemujur program nya.
Bela datai, Pegawai Pelilih Marudi Rose Edward Tarang enggau Tuai Komuniti Iban Pelilih Marudi ti mega Chairman Komiti Pengatur Pengerami Mantar Gawai Marudi 2026, Pemanca Randi Bundan. - EDISI UKAS
