GEDONG: Pengeleda komuniti Islam besimpan tumu ungkup tuju ibadah korban dipeda majak nambah seraya nentuka pengawa ibadah dipejalai manah enggau berurun agi ninting taun.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, majak mayuh komuniti Islam ngereja ibadah korban asil inisiatif besimpan ninting bulan.
Ku iya, pekara nya ukai semina mandangka pengeleda raban Islam ba pengarap, tang mega nyadi kelai penuduk ekonomi komuniti majak manah enggau entap.
"Tu mandangka ekonomi kitai majak nambah.
"Ambi ke chunto, staf Dewan Bandaraya Kuching Utara (DBKU) ti besimpan tumu ninting bulan dikena meli jelu," ku iya.
Iya madah munyi nya lebuh dirandau pemberita pengudah bejadi Pengawa Nyuaka Chapi enggau Dagin Korban Kunsil Nengeri (DUN) Gedong, di Masjid Al-Kawthar, ditu kena Hari Empat.
Premier Sarawak mega madah ke nya siti wakaf ke pemaik komuniti.
Terang iya, semangat ti dikemeran nengah besimpan sepanjai taun nya patut dichunto laban nya bukti pengeransing raban Islam ngereja ibadah enggau mantu raban ti begunaka bantu.
"Nya kebuah, diatu kitai meda komuniti Islam bisi pengeleda ke alai ngereja pengawa tumu agi nengah besimpan belanja dikena meli jelu maya udah datai awak nya," ku iya baru.
Nitih ke penerang, bisi 150 raban Islam ba konstitusyen DUN Gedong nerima pemaik ari agih dagin korban iya nya 26 iku chapi.
Ari penyampau nya, Premier Sarawak udah meri 19 iku chapi seraya Kaban Parlimen Batang Sadong Rodiyah Sapiee enggau Agrobank Sarawak bela meri enam iku enggau siku chapi ungkup tuju sebaka.
Bela datai, Sapit Menteri ba Opis Premier Sarawak (Penyeraris Projek Ungkup Agensi Pemansang Kandang Menua, DBKU enggau Pekara Islam) Datuk Dr Abdul Rahman Junaidi, pengari khas ADUN Gedong Dato Sri Mohamad Naroden Majais, Kaban Parlimen Batang Sadong Rodiyah Sapiee, Mufti Nengeri Sarawak Datu Khalidi Ibrahim, Residen Bagi Menua Samarahan Mohamad Irwan Bahari Bujang enggau Pegawai Pelilih Gedong Jamain Wahab. -EDISI UKAS
Pemberita: Jonnie Kiew
Gambar: Zulfadli & Natalie Cherinie Johnny
