KUCHING: Raban Pejilin enggau Pandu Puteri deka ngasai taba ngatur aktiviti ti manah agi di Matang nengah pemansang siti kompleks.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, taba nya deka bisi begunan kediri empu nentuka aktiviti ulih dipejalai kededua raban nya.

“Kitai mega benung ngemansang siti begunan ti baka dipadah ngagai aku, udah tembu urung 70 peratus lalu semina 30 peratus da benung digaga.

“Pengudah tembu ila, tu deka nyadi siti peluang enggau fasiliti ngagai raban Pejilin enggau Pandu Puteri ari selampur Malaysia begempuru sereta ngatur bemacham aktiviti ti bekaul,” ku iya.

Iya madah munyi nya maya dirandau pemberita pengudah Pengawa Nasih Tanah Indu Opis Besai Pejilin Malaysia Pampang Sarawak di Batu Lintang kena Hari Enam.

Iya ti mega Tuai Pejilin Sarawak mega madah, fasiliti ti dikemansang tu dikena matih raban nembiak ti ngulu raban Pejilin enggau Pandu Puteri ngambi ulih ngatur aktiviti ti nempa pemereti ati sereta nempa pemanah ulah.

Ku iya, perintah nengeri sebedau tu udah nyerahka endur nya ngagai raban Pejilin enggau Pandu Puteri ngambi nyadi palan aktiviti sereta taba ngatur pengawa nyengkaum kala nyadi endur ngatur 'Jambori'. -EDISI UKAS

Pemberita : Ahmad Daniel Faiz
Gambar: Ameerul Shafiq Khir