PADAWAN: Raban nembiak diperansang terus nyaga pesaka budaya komuniti Bidayuh ti ukai semina nyadi lambang pesaka asal, tang mega mandangka reti pengidup, penyerakup sereta pemereti ati komuniti.

Sapit Menteri Pengangkut Sarawak, Datuk Dr Jerip Susil madah, pesaka budaya baka adat asal, pengawa beterima kasih pengudah musin ngetau sereta main asal baka bunyi tawak enggau tanda asal nya identiti beguna komuniti ti meseti dijaga belama.

“Berebak enggau nya, raban nembiak ti ngambi bagi ba aktiviti main asal beguna amat nentuka tradisyen meruan ditampung, kelebih agi ba jeman moden ti majak diparit ubah gaya idup,” ku iya.

Iya madah munyi nya ba Pengerami Mantar Gawai Kampung Emperoh Karu, ditu kena Hari Lima.

Iya mega madah, pengawa mekuh budaya mega deka ditegap nengah ngatur pekit main asal baka tanda asal, pekayan adat enggau mangkung tawak kelimpah ulih diangkat nyadi produk dagang temuai budaya.

Nambah ke nya, Datuk Dr Jerip ti mega Kaban Kunsil Nengeri (ADUN) Mambong madah ke siti balai mayuhguna baru Taba RGC Bayur diatu benung digaga lalu deka nyadi palan besai ngintu Gawai Dayak richah agi enggau ulih nangkup lebih 1,000 iku.
Bela datai, Pegawai Opis Pelilih Mit Padawan, Julius Scott Sapong. - EDISI UKAS