KUCHING: Perambu Projek Kerita Api Api Trans-Borneo di Sarawak ti ngaul jalai Bintulu-Samalaju diatu benung ba renggat ditungkap Perintah Besai nengah Unit Perambu Ekonomi (EPU) Malaysia.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, tungkap nya sebagi ari projek Kerita Api Trans-Borneo nengah kerejasama Perintah Malaysia, Indonesia enggau Brunei.

“Naka diatu, tungkap nya benung dipejalai Unit Perambu Ekonomi Malaysia (EPU).

“Ba kitai, lebuh rentayan nya udah dikelala, kitai deka belabuh ngaga jalai kerita api ari Bintulu ke Samalaju bepelasarka rentayan nya.

“Pekara tu benung dikerandau begulai enggau raban ti bejalaika tungkap ba renggat Perintah Besai lalu kitai ba Perintah Sarawak deka meri sukung rat,” ku iya.

Iya madah munyi nya lebuh dirandau pemberita pengudah Pengawa Nasih Tanah Indu Opis Besai Pejilin Malaysia Pampang Sarawak di Batu Lintang kena Hari Enam.

Ku Datuk Patinggi Abang Zohari, pemansang jalai nya beguna amat berindik ari Bintulu enggau Samalaju diatu mansang nyadi kluster industri baruh karbon ti begunaka sistem pengangkut deras agi dikena nyukung pejalai kargo enggau aktiviti industri.

Tambah mega, ku iya, perambu tumu perintah nengeri iya nya ngena sistem Autonomous Rapid Transit (ART), tang kerita api engkeman dipejalai bepelasarka gaya rampa menua sereta perambu ti dibantai nengah tungkap Perintah Besai.

Ngenang engka jalai nya dikerembai nyentuk Kuching, Premier Sarawak madah ke pekara nya agi bepanggai ba rentayan nasional ti deka diputus ila lalu meseti dipejalai berenggat berindik ari pemansang sistem kerita api nya begunaka besai belanja.

Kelimpah ari nya, iya mega enda ngenggaika engka ngena teknologi hidrogen nyadi pemansut kuasa kerita api dudi hari ketegal ungkus pemansut hidrogen diatu majak kompetitif dibanding diesel enggau minyak bukai. - EDISI UKAS