MERADONG: Program Penemuai Mantar Gawai Hari Ke-20 ditampung ngagai sekeda rumah panjai ba Sungai Petai enggau Skim B Meradong kena Hari Empat.

Kaban Kunsil Nengeri (ADUN) Meradong, Datuk Ding Kuong Hiing berasai gaga laban ulih nampung tradisyen Penemuai Mantar Gawai ninting taun nadai ngira pemesai tauka endur rumah panjai ti dilawa.

Ku iya, penemuai nya nyadi pelasar pemadu manah betemu terus enggau peranak, mendingka penanggul ti dibantai Tuai Rumah sereta ngabas peminta komuniti menua.

“Tu ukai semina pejalai nemuai, tang siti chara nyempil kaul enggau rayat nentuka sada peranak ba DUN Meradong terus diberi perati ba tiap penemuai Mantar Gawai ba rumah panjai,” ku iya.

Nambah ke nya, Datuk Ding madah ke pemansang ba kandang menua pesisir baka Meradong deka terus ditegap seagi Sarawak dikemudi Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg.

Iya mega madah, bemacham insentif udah disediaka Perintah Sarawak ngagai rayat ti ngembuan status ‘K’ ba tingki, nyengkaum bantu ngagai indai ti baru beranak, orang tuai, orang bujang enggau sida ti udah beruang bilik sereta nembiak ti nampung pelajar ngagai palan pelajar tinggi.

Berebak enggau nya, iya ngelalau peranak rumah panjai terus meri sukung rat ngagai Perintah Sarawak diiring Gabungan Parti Sarawak (GPS) ti semampai ngemerat pengelantang rayat sereta pemansang nengeri. - EDISI UKAS