Bekal Ai Miri Pulai Baka Selama Pengudah Kereja Ngadu Paip Besai Tembu
MIRI: Bekal ai di Miri diatu udah pulai baka selama pengudah kereja ngadu paip besai bediameter 1,100 milimeter di Batu 7, Jalai Miri-Bintulu mujur tembu, lalu mutar penanggul bekal ai tejanggal ditapi peranak, premis dagang enggau institusyen ba mengeri besai nya kandang berapa hari ke udah.
Ba siti penerang media kemari, Menteri Pengangkut Sarawak ke mega Kaban Kunsil Nengeri (ADUN) Senadin, Dato Sri Lee Kim Shin madah, pemujur ngaduka bekal ai nya asil kerejasama rat semua raban agensi perintah, operator utiliti, organisasyen komuniti, raban terabai gawa, media, voluntia enggau mensia mayuh.
Ku iya, utai ke nyadi sekumbang bekal ai tejanggal nya mandangka semangat kerejasama, pengeransing enggau penyerakup komuniti ba semua raban bekaul.
Ku iya, taja jaku gerah tumu udah dikeluar lalu penguna dilalau nyimpan ai ke chukup sebedau pengawa dipejalai, iya mereti ke pemar ditapi rayat, pedagang, sekula, hospital enggau institusyen bukai ti napi penanggul nya.
Iya mega bisi ngabas ngambi meda empu gaya pejalai pengawa ngadu paip, endur nyadung bekal ai sereta endur ti napi penanggul kelimpah ngerandau peranak sereta raban terabai ke gawa ba menua.
Ku iya, pengeran semua raban ngasuh iya temegah lebuh sida sanggup gawa nadai ngira jam nyengkaum maya malam hari enggau gaya hari ke mar.
Iya madah, ujan bangat ngasuh pengawa ngadup paip lubah kelimpah meri penanggul ari sukut teknikal enggau injiniring.
Taja pia, semua nya enda ngasuh raban ke gawa mantul ati nentuka pengawa ulih tembu enggau likun sereta jampat.
Dato Sri Lee mega meri terima kasih ngagai Sarawak Water ke ngemudi pengawa ngadu enggau mulaika bekal ai sereta semua agensi sereta organisasyen ke gawa.
Entara agensi nya baka Opis Bekala Ai Menua Pesisir (JBALB), Opis Bomba enggau Penyah Penusah Malaysia (JBPM), Opis Kereja Raya (JKR), Sarawak Energy, Opis Residen Bagi Menua Miri, Opis Pelilih Miri, Opis Pelajar Pelilih Miri, Kaunsil Mengeri Miri (MCC), Polis Diraja Malaysia (PDRM), Raban Soldadu Malaysia (ATM), Serakup Bulan Sabit Merah Malaysia (PBSM), Opis Menteri Dagang Dalam Menua enggau Belanja Idup (KPDN), Hospital Miri, bala bakih media, voluntia sereta orang ngati kediri ti sama besaup ngemujurka operasyen nya.- EDISI UKAS
