KUCHING: Sekretariat LOC Sarawak udah ngatur aum kedua kena Hari Lima ungkup berandauka pengawa besikap ngatur pekit Lumba Asia Tenggara (SEA) 2027 ditaga diatur ari 18 nyentuk 29 September ditu.

Aum betuaika Sapit Sekretari Perintah Sarawak (Operasyen) ke mega Chairman Sekretariat LOC Sarawak, Datu Hii Chang Kee nya nyelinting pengawa ngaluska pangku pengawa tetiap komiti ke dipadu bejalaika pengawa ditetapka.

Nentuka pengawa besikap lanchar, operasyen Sekretariat LOC Sarawak udah dibagi ngagai empat unit besai ti deka bejalaika mayuh pengawa.

Unit Strategic, Governance And Communication betuai ke Jenny Lee Siak Ne, Unit Corporate Services And Commercial Affairs betuai ke Asmawaty @ Siti Asmah Ahmad, Unit Venue Preparations, Games Operation And Stakeholders Experience betuai ke Abdul Rani Abdullah seraya Puvindra Pubeion Jayakumar ngetuai ke Unit Digital, Technology And Games Systems.

Datu Hii mega meransang semua komiti regas bejalaika pangku pengawa diri nentuka tetiap pengawa ditetap ulih dipun enggau jampat.

Ngenang pasal pengawa besikap, iya madah ke program Pelanda Sempun Lumba SEA 2027 Kluster Sarawak disadang belabuh taun baru ba semua bagi menua nengeri.

Dikena ngerichahka agi program nya, ku iya, bela diatur pejalai enggau mayuh program bukai.

Ke penemu, Sarawak deka ngatur 17 ari 38 bansa lumba enggau main maya Lumba SEA 2027 ditaga diatur ari 18 nyentuk 29 September.

Lumba enggau main nya nyengkaum akuatik, angkat berat, e-lumba, gimnastik, golf, kriket, nimbak, muay, petanque, skuasy, taekwondo, tenis, wushu, bola keranjang, tenpin boling, boling padang enggau nimbak laja.

Kelimpah ari nya, Sarawak mega diberi basa nyadi endur pengerami bejadi pekit besai nya. - EDISI UKAS