KUCHING: Perintah Sarawak nengah Opis Menteri Nembiak, Lumba enggau Pemansang Orang Dagang Sarawak (MYSED) merambu numbuhka siti ‘high performance centre’ beteknologi tinggi ba genturung Kompleks Lumba Sarawak ungkup pengawa strategik ngenegapka pemansang atlit elit enggau nyungkak pemujur lumba nengeri ke tikas antarabansa.
Menteri MYSED, Dato Sri Abdul Karim Rahman Hamzah madah, palan nya ditumbuh beguna endar ngagai sebarang nengeri tauka menua ke ngembuan juluk nyapai penyulut ba pengawa lumba enggau main.
Ku iya, endur numbuhka palan nya udah dikelala ba dalam Kompleks Lumba Sarawak lalu diatu ba renggat perambu sereta tungkap.
“Kami udah nemuai ke sekeda menua nyengkaum New Zealand, Korea Selatan enggau Australia dikena nungkap baka ni sida ngemansangka palan prestasyen tinggi.
“Ukai reti endur nya meseti besai, tang patut disikap perengkaguna enggau teknologi ke ulih ngaluska prestasyen atltit elit ke udah dikelala,” ku iya lebuh dirandau media, ditu, Hari Lima.
Ngenang pasal pejalai projek, Dato Sri Abdul Karim madah ke perintah diatu berati ke pengawa besikap ngatur Lumba SEA 2027 dulu, nya kebuah pengawa numbuhka palan nya disadang belabuh pengudah pekit nya diatur.
Palan nya ila, ku iya, deka nunda model pemansang lumba dikena ba Australia enggau New Zealand laban kededua menua nya ngembuan rikod nyulut ba pengawa nempa atlit tikas Olimpik.
Tambah mega ku iya, projek nya deka dipelanja Perintah Sarawak enggau kerejasama sereta sukung ari raban Institut Lumba Menua (ISN), kelebih agi nyedia penemu pakar sains lumba enggau main. -EDISI UKAS
