KIK Patut Nyadi Penyungkak Transformasyen Servis Perintah, Ukai Semina Pekit Aja
KUCHING: Projek ke ditengkebang nengah Konvenysen Raban Inovatif enggau Kreatif (KIK) enda patut semina dikena bepekit aja, tang patut dikena, direplikasyen enggau dikerembai ungkup nyungkak transformasyen bejalaika servis perintah ke ngasi enggau besai empas ngagai rayat.
Menteri Dagang Temuai, Industri Kreatif enggau Seni Pemerindang Sarawak, Dato Sri Abdul Karim Rahman Hamzah madah, chara nya beguna endar nentuka tetiap penemu enggau inovasyen ke dibantai ulih meri asil kebendar dikena nangkup utai diguna rayat lebuh bejalaika servis ke sikar, dinamik enggau bepelasarka asil.
“Mini Konvensyen KIK udah nyadi mekanisme strategik ke nyungkak evolusyen ngenataika servis perintah nentuka tetiap projek KIK ke ditengkebang bepun enggau juluk meri asil besai enggau diseraris bemalinka juluk Strategi Pemansang Pengudah COVID-19 (PCDS) 2030 nyadi tiang pemun pemansang Sarawak,” ku iya.
Iya nyebut pekara nya ba mua mayuh rambau Pengawa Nyua Anugerah Mini Konvensyen KIK Opis Menteri Dagang Temuai, Industri Kreatif enggau Seni Pemerindang Sarawak (MTCP) enggau Opis Menteri Nembiak, Lumba enggau Pemansang Orang Dagang Sarawak (MYSED), ditu kena Hari Lima.
Berindik ari nya, iya ke mega Menteri Nembiak, Lumba enggau Pemansang Orang Dagang Sarawak nyemetak madah, inovasyen ti ditengkebang enda patut semina ditatak dikena siti-siti agensi aja, tang patut ulih disetipak enggau dikena agensi bukai ngena chara Whole-of-Government.
Ke penerang, Mini Konvensyen KIK 2026 udah ngempuruka 17 raban ngaul lebih 123 staf MTCP enggau MYSED ari selampur Sarawak.
Ari MTCP, Raban CITRA bulih lumur satu nerima perais mata duit RM2,000 seraya Raban MUSES ba penuduk kedua enggau perais mata duit RM1,500.
Seraya ari MYSED meda Raban OPTIMUS menggi gelar champion ti nerima perais mata duit RM2,000.
Lalu Raban Impact V3nus enggau Raban MASPINE ba penuduk kedua enggau ketiga ke nerima RM1,500 enggau RM1,000.
Sama datai, Sapit Menteri Dagang Temuai, Industri Kreatif enggau Seni Pemerindang Sarawak Datuk Sebastian Ting Chiew Yew, Sekretari Mendam MTCP Morshidi Fredrick, Sekretari Mendam MYSED Dzulkornain Masron, Pegawai Tadbir Khas MTCP Datu Dr Rashidah Bolhassan sereta bala tuai opis ke bukai. -EDISI UKAS
