KAPIT: Projek ari baruh Program Transformasen Menua Pesisir (RTP) Jalai Genturung Pendiau ke Rumah Ragai, Sungai Gaat sepanjai empat kilometer ke digaga Perintah Sarawak dikeandal meri pemaik besai ngagai peranak menua nya enggau nambah akses sereta negap rentayan penyambung ba menua ulu.

Kaban Kunsil Nengeri (ADUN) Baleh, Nicholas Kudi Jantai madah, pengawa nyendiaka infrastruktur pemun baka jalai alun nya entara pengawa seruran dipejalaika perintah nengeri nentuka peranak menua pesisir bela ngasai perengkaguna enggau pemansang ke meruan agi.

Ku iya, taja projek jalai nya agi ba renggat pun pengawa, tang nya beguna endar dikena ngenegapka rentayan penyambung enggau ngerandang mayuh agi peluang pemansang ngagai komuniti dia.

“Ari jalai digaga tu, peranak menua pesisir ulih ngasai perengkaguna ke meruan agi lalu enda majak tinggal ari arus pemansang ke diasai menua bukai,” ku iya lebuh bejadika projek nya di Rumah Ragai, Sungai Gaat, kena Hari Empat.

Iya mega nyemetak madah, perintah nengeri ransing gawa ke pemansang infrastruktur di menua ulu nentuka pemansang ti sebela ulih diasai semua rayat Sarawak.

Pengawa udah nya ditampung enggau Ngiling Bidai kelai nutup Gawai Dayak sebedau diujung enggau pengawa berandau enggau peranak.

Sama datai, pengari Opis Pelilih Bukit Mabong George SAO, pengari Opis Residen Kapit Roland, sereta bala tuai raban bansa enggau tuai komuniti dia.-EDISI UKAS