KUCHING: Indu Opis Besai Pejilin Malaysia Pampang Sarawak deka digaga baru ngena fasiliti ti genap agi dikena negap pemansang rebak biak di nengeri tu.
Premier Sarawak ti mega Tuai Pejilin Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, projek ti dipelaba beungkus RM20 juta nya ukai semina ngaga siti begunan baru, tang mega dikena nempa ekosistem sereta sukung rama ungkup raban nembiak.
Ku iya, indu opis ti diatu digelar Begunan Tun Openg mega deka disikap fasiliti baru baka hostel ke mega hotel ungkup raban pejilin selampur Sarawak enggau galeri khas mandangka sejarah pejalai Pejilin di Sarawak.
“Utai ti dikedeka aku iya nya siti ekosistem enggau sukung rama ti meseti diberi kitai ngagai raban nembiak ungkup pemansang sida dudi hari.
“Begunan tu deka nyadi sebagi ari tiang sukung rama nentuka raban pejilin ulih terus nyeridi rebak biak ari sukut disiplin nadai ngira tirai juru rama,” ku iya.
Iya madah munyi nya ba Pengawa Nasih Tanah Indu Opis Besai Pejilin Malaysia Pampang Sarawak di Batu Lintang, kena Hari Enam.
Ku iya agi, begunan nya nyadi lambang semangat kerejasama ke alai pengawa nyendia baka hostel nya mega siti ari fasiliti ungkup raban nembiak diau bemalam enggau mega endur berandau pasal pemansang dudi hari ukai semina bekaul pejilin, tang mega pemansang komuniti di Sarawak.
Ngenang silik pasal agih belanja, Premier Sarawak minta nambah belanja tambah ngagai agih belanja asal RM20 juta berindik ari bisi komponen ditambah ba langkar tengkebang begunan nya nyengkaum ungkus kereban berumah nambah.
Tang, iya ti mega Tuai Pejilin Sarawak enda ngemendar agih belanja tambah laban begunaka sanding penemu ari raban arkitek dikena ngira ungkus ti diguna kelebih agi nambah unit baru ba langkar tengkebang begunan nya.
Ke rikod, begunan indu opis Serakup Pejilin Malaysia Pampang Sarawak nyau deka angus kena 6 Februari 2024.
Bela datai, Penyanding Penemu ba Opis Premier Sarawak ti mega Chairman Kaunsil Pejilin Sarawak Tan Sri Dato Sri William Mawan Ikom, Mandal Chairman Kaunsil Pejilin Menua Dato Mohamad Safri Datuk Abdillah, Mandal Chairman Kaunsil Pejilin Sarawak Jumaat Ibrahim sereta temuai dipebasa bukai. - EDISI UKAS
Pemberita : Ahmad Daniel Faiz
Gambar: Ameerul Shafiq Khir
