KANOWIT: Tradisyen Ngabang Mantar Gawai ti diatur Kaban Kunsil Nengeri (ADUN) Ngemah, Anyi Jana ditampung taun tu dikena ngundang peranak ba Kunsil Nengeri (DUN) Ngemah serimbai Pengerami Gawai Dayak 2026.
Ku iya, program nya nyadi pelasar beguna betemu terus enggau komuniti menua kelimpah ngerapit kaul entara tuai enggau rayat.
“Program tu diatur ngambi betemu enggau peranak ba Ngemah serimbai Pengerami Gawai Dayak 2026 ke ali program nya diatur ari 28 Mei nyentuk 1 June 2026,” ku iya ba program nya, kena Hari Enam.
Iya mega ngelalau komuniti Dayak terus nentuka Gawai Dayak dikena ngerapit kaul diri sebilik enggau kaban belayan seraya ngetan budaya ngabang.
Nambah ke nya, Anyi mega bekunsi berita manah bekaul servis feri Sedaya ti diatu udah beoperasyen ngena dua feri dibanding semina siti aja sebedau tu ke pemaik peranak menua.
Ku iya, serimbai Pengerami Gawai Dayak taun tu, jam operasyen Feri Sedaya mega dilanjar belabuh pukul 4 pagi nyentuk 12 tengah malam dikena ngemuntang pejalai peranak ti pulai ke menua enggau ngabang ngagai kaban belayan.
Kelimpah meri perati ngintu pengerami, Anyi mega madah ke penemuai gawa Sapit Premier Sarawak, Datuk Amar Douglas Uggah Embas ke Ngemah ti deka diatur 26 June 2026.
Dulu ari nya, Anyi begulai enggau bini, Gelim Utan sereta raban ngepun pejalai ngabang belabuh ari pukul 9 pagi ba Sungai Tuah ngaul Rumah (Rh.) Seliau, Rh. Icha dan Rh. Lily Apang, sebedau nuju Sungai Pedai di Rh. Anthony Langit.
Udah nya, sida nampung pejalai ngabang ke Ulu Pidai dikena ngundang peranak di Rh. Connie, Rh. Tadong, Rh. Jawa sereta Rh. Jati Tanggai, lalu nembuka program nya di Nanga Tada ngaul Rh. Bulan sereta Rh. Edmund pukul 9 malam.
Bisi mega nyempulang iya nya Pegawai UKAS Bagi Menua Sibu Jelani Ajang, Sarjan Bidat ari IPD Kanowit, Penghulu Pree Minggat, Penghulu Lembat Atau, Penghulu Kong Chak Pui sereta pegawai ari Palan Servis DUN Ngemah. - EDISI UKAS
